Shimura: high rise buildings ok, pero...

Walay problema para kang Kongresista Sun Shimura nga tukorong high rise building sa isla sa Bantayan, apan kinahanglan nga nisubay kining tanan sa balaod ug dili makaguba sa kinaiyahan.

"Why not? Maldives has it, other countries has it di ba, in  front of the beach? We will just work out, una ang sewarage system, maayo ba ilang treatment facility, naa ba sila ana nga facilities. As long as kumpleto and nindot ang ilang facilities nga ibutang, para dili pud madaot ang isla," matud ni Shimura ngadto sa mga sakop sa media atol sa sideline sa State of the Province Addres (SOPA) ni Gobernador Pamela Baricuatro niadtong Agosto 29.

Sumala sa kongresista nga anaa ra kini sa local government unit (LGU) kun motugot ba nga adunay motukod og mga buildings sa ilang lugar, base sa ilang Comprehensive Land Use Plan (CLUP).

Ang CLUP mao ang dokumento nga naglatid sa desinyo aron magiyahan ang mga LGUs sa mga aksyon nga himoon niini hilabina sa pag-gamit sa mga luna o propedad nga anaa sulod sa usa ka lungsod o siyudad.

Pinaagi sa CLUP,  ma-identify ang mga lugar kun asa mamahimong magtukod og mga proyekto sa imprastraktura, asa ang wetlands, asa ang lugar nga mamahimong mapalambo ug uban pa.

"It's really up to the LGU, it's really up sa CLUPs. The reason why Boracay na ing-ato to because wala pay CLUP that time ang Boracay, so that's why we need to work on the comprehensive land use plan. If it's there, it's gonna be okay," matod ni Shimura.

Alang ni Shimura, dili angay hikawan ang mga taga isla og oportunidad nga molambo pinaagi sa mga livelihood, tourism ug maayong transportasyon, apan kinahanglan sab ang bisa'g unsang development, ikonsiderar ang epekto sa kalikopan o kinaiyahan.  Ang lungsod sa Santa Fe sa isla sa Bantayan ilado nang daan nga tourism destination sa Sugbo.

Apan nabutang kini karon sa kontrobersiya tungod sa luxury resort nga The Stria nga gitukod atubangan sa baybayon sa maong lungsod.

Ang maong high-rise building, giingon nilapas sa Environmental Compliance Certificate (ECC), butang nga gihimakak sa  developer.

Si Shimura miduso og balaudnon aron pagdeklarar sa pipila ka parcels sa luna sa Bantayan Island nga protected area o pag-reclassify sa wilderness status sa isla sa       Bantayan.

Ang maong balaudnon nga iyang giduso niadtong Hulyo 2, 2025, iyang gihulagway nga usa ka damgo alang sa mg Bantayanon nga hingpit na nga makapanag-iya o makapatitulo sa ilang mga luna sa isla. (BANAT NEWS)