Kuya Nick ituboy para sa National PCLF

CEBU, Philippines — Human siya nasublian pagka-pangulo sa Philippines Councilors League Cebu Provincial Federation , si Toledo City Councilor Ricardo “Kuya Nick” Pepito mipadayag nga iyang gitinguhang matudlo sab sa nasudnong posisyon sa liga. Kagahapong adlawa, si Pepito ug mga kaubanang opisyales giproklamar isip mga bag-ong opisyales sa grupo.

Si Pepito nasublian pagka-presidente; Vice President si Dumanjug Councilor Eric Elmer Gica;  Secretary General si Pinamungajan Councilor Marvin Miralles; Treasurer si Tabogon Councilor Kyle Chezka Hortelano; Auditor si Madridejos Councilor Venice Cyrus Rebadomia; PRO si Minglanilla  Councilor Oscar dela Calzada, Jr.; Business Manager si Toledo City Councilor Amuerfino Perales.

Samtang ang mga Board of Directors, mao silang Cordova Councilor Dason Patric Lagon,Liloan  Councilor Katherine Jumapao , Poro Councilor  Ashley Otadoy , Talisay City Councilor Eduardo Gullas III, Bogo City Councilor Erwin Rosal, Consolacion  Councilor Elenito Palang , Boljoon Councilor Merlou Derama; ug Daanbantayan  Councilor Louise Marvi Loot Pinos.

Nanumpa sila atubangan ni Cebu Third District Representative Karen Hope Garcia.

Isip pangulo sa PCL sa probinsya, otomatikong mamahimong Provincial Board Member si Pepito.

“This election is not only a democratic exercise but also a testament to our shared commitment to effective and transparent governance,” matud pa niya.

Si Pepito naila na sa iyang mga kaubanan nga lig-ong pambato sa rehiyon alang sa umaabot nga  regional elections karong Nobiyembre.

Kun mapili siyang pangulo sa PCL sa rehiyon, nagtinguha siya nga mapili sab sa nasudnong PCL. Sa pagkakaron, gibutyag ni Pepito nga mipadayag kaniya og suporta ang mga PCL chapters sa rehiyon 6, 7, 8, ug 9 o Visayas bloc, tungod ani, posibleng ma-nominado siya para sa national leadership sa PCL sa umaabot nga 2026 elections sa bulan sa Marso.

Sa iyang pagpamulong kagahapon, iyang gihimug-atan ang panaghiusa, integridad ug sentro gyud unta sa panerbisyo publiko ang kaayohan sa katawhan nga ilang giserbisyohan.  Gikan sa The Freeman, IBM BANAT NEWS