Engineer, traffic aid nangaangol human pamusila
CEBU, Philippines — Naangol ang usa ka engineer ug contractor human kini pusila samtang nagsakay sa iyahang motorsiklo sa may Sitio Omanod, Barangay San Francisco, Lungsod sa Sta. Catalina, Probinsiya sa Negros Oriental kagahapon sa buntag.
Ang biktima usa ka 58-anyos nga lalakeng contractor, nagpuyo sa Barangay Manalongon, Lungsod sa Sta. Catalina sa maong probinsiya.
Samtang ang kriminal usa ka wala mailhing lalaki kinsa sakay og XRM nga motorsiklo nga kolor itom.
Nagkanayon si Police Lieutenant Stephen Polinar, tigpamaba sa Negros Oriental Police Provincial Office nga ang biktima contractor sa usa ka quarry site sa Lungsod sa Sta. Catalina. Sa wala pa mahitabo ang insidente ang biktima nangape pa kuyog ang mga higala niini ug human mangape nisakay ang biktima sa iyahang motorsiklo kay moadto sa quarry site apan giingong gisundan kini sa kriminal.
Ug pag-abot ngadto sa naasoy nga dapit gipusil sa kriminal ang biktima hinungdan nga natumba kini.
Ang biktima na-rescue kini ug gidala sa tambalanan.
Padayon pa ang kapolisan sa pagpahigayon og imbestigasyon sa maong hitabo pagdeterminar sa motibo sa pagpamusil ug pag-ila sa kriminal. Na-recover sa mga polis diha sa lugar nga nahitaboan ang usa ka fired cartridge sa kalibre .45. Sa laing bahin, naangol ang usa ka traffic aid human kini pusila sa duha ka wala pa mailhing kriminal diha sa Don Gil Garcia Street, Barangay Capitol Site, Dakbayan sa Sugbo kagahapon sa hapon.
Ang biktima nga si alyas “Rodney”, daling gidala diha sa Vicente Sotto Memorial Medical Center. Padayon usab ang imbestigasyon sa kapolisan sa Abellana Police Station sa Cebu City Police Office sa pagpiho sa motibo sa maong krimen. — ( Banat News )
- Latest
