Senior citizen gikulata sa tulisan

CEBU, Philippines — Nabulit sa mga bun-og ang nawong ug uban pang bahin sa lawas sa usa ka 64- anyos nga senior citizen nga gitulis sa duha ka batan-ong lalaki, insidente nahitabo diha sa Purok Mahogany, Barangay Cotcot, Lungsod sa Liloan kagahapon sa kadlawon.

Si Police Lieutenant Colonel Dindo Juanito Alaras, hepe sa kapolisan sa maong lungsod niila sa biktima nga si Arthuro Tagalog, 64-anyos, nagpuyo sa maong dapit.

Ang suspetsado nga si Armando Sacristan Vergara, 23, residente usab sa lugar ang nasikop sa mga tanod nga nitubag sa alarma.

Base sa imbestigasyon sa kapolisan nasayran nga padulong na untang mopauli sa ilang panimalay ang biktima sakay sa iyang motorsiklo.

Ug sa paghidangat sa biktima diha sa gi-riprap nga bahin sa Barangay Cotcot kalit lang kining gibabagan sa duha ka batan-ong lalaki dungan ang pagdeklara og tulis. Gikataho nga nagpakiluoy si Tagalog ngadto sa mga tulisan nga dili lang siya tulison apan wala kini panumbalibanga ug ang usa sa mga tulisan ang nisukmag sa nawong sa biktima ug uban pang bahin sa iyang kalawasan.

Gikuha sa kaubang tulisan ang kwarta sa biktima nga P10, 000 dayong sibat pahilayo sa maong dapit.

Nakapangayo og tabang ang biktima sa mga tanod sa Barangay Cotcot ug daling niresponde ang mga tanod ug gigukod ang mga tulisan kinsa si Vergara ang nasikop ug gitahan kini ngadto sa kapolisan.

Samtang ang kauban sa suspetsado nga gikatahong maoy nagkuha sa kwarta sa biktima ang padayon pa nga gipangita. — /BDB (BANAT NEWS)