Garganera nangayo og update sa Master Drainage Plan

CEBU, Philippines — Mangayo si Konsehal Joel Garganera og klarong update gikan sa Cebu City Planning and Development Office (CPDO) ug sa Department of Public Works and Highways (DPWH) kabahin sa kahimtang sa Drainage Master Plan sa siyudad.

Matud ni Garganera nga adunay Drainage Master Plan ang siyudad nga naaprobahan pa niadtong 2005 diin matawag nga karaan na ug dili na mohaom sa karong nanaghan na ang estraktura sa siyudad.

Nipahimangno usab ang konsehal nga kinahanglang mahatag ang update sulod sa 15 ka adlaw tungod kay nagkagrabe na ang pagbaha sa siyudad nga resulta sa karaan ug dili na epektibong drainage system.

Gihulagway ni Garganera nga matag bunok sa uwan mahimong “Cebu’s oldest river” ang “Cebu’s oldest street” sa siyudad diin lakip usab sa makasinati og pagbaha ang mga kasikbit nga mga dalan. Si Garganera nagkanayon nga kong dili kini matubag ang maong problema, magbalik-balik kini hangtud sa mosunod nga henerasyon.

Samtang, giila usab ni Garganera ang climate change nga mao ang usa ka hinungdan sa pagbaha ug gidugangan sa daghang lokal nga mga isyu sama sa barado nga drainage system, walay klarong plano sa pagtukod sa mga estraktura, walay klarong pagpatuman sa flood control projects ug sayop nga urban planning.

Nisugyot si Garganera sa inanay nga pagsulbad sa baha sama sa pag-update ug kinahanglan nga mohangop sa modernisasyon ang drainage system, pagpanglimpiyo sa mga estero, pagtangtang sa mga babag sa tubig ug pagpatuman sa rain water catchment systems sa constructions.

Kinahanglan usab ang koordinasyon pinaagi sa pagpalig-on sa kolaborasyon sa mga inter-city ilabina sa programang “Beyond Borders” nga magtinabangay ang Sugbo ug Mandaue sa pag-atiman sa mga sapa sama sa Mahiga ug Butuanon.

Gihimug-atan usab ni Garganera ang pagbag-o sa batasan sa mga tawo pinaagi sa padayon ug inobatibong kampaniya sa impormasyon.

Giklaro ni Garganera nga ang baha dili usa ka problema, sintoma lang kini.

Ang matuod nga problema mao ang guba nga sestema nga walay tinud-anay nga koordinasyon. — /BDB (BANAT NEWS)