Pedestrian overpass tukoron sa CSCR

CEBU, Philippines — Ang plano sa pagtukod og pedestrian overpass daplin sa Cebu South Coastal Road, nga apil usab ang pagpaayo sa maong lugar, naabot na sa right-of-way acquisition stage.

Tungod niini, ang Cebu City Council mipangayo una og komento ug rekomendasyon gikan sa mga hingtungdan nga departamento, lakip na ang City Legal Office.

Sa usa ka sulat nga gi-address kang Cebu City Mayor Nestor Archival Sr. ug gipasa sa konseho niadtong Hulyo 29, 2025, ang Regional Director sa Department of Public Works and Highways (DPWH) nga si Danilo Villa Jr., mitaho kabahin sa kahimtang sa ilang proyekto nga pagtukod sa overpass apil na ang pagpalambo diha sa South Road Properties.

Gikatakda nga itukod ang overpass sulod sa South Road Properties (SRP), Cebu City, nga adunay gitas-on nga 48.56 ka linear meters.

Sa suwat ni Villa niadtong Hulyo 8, 2025, gipresentar sa DPWH ang conceptual plan sa proyekto, diin makita ang mga parte sa yuta diin ipamutang ang mga haligi sa overpass.

Iyang gidugang nga base sa approved sketch plans sa DPWH, ang mga yuta nga maapektuhan sa pagtukod nakarehistro sa ngalan sa Cebu City Government.

Basi sa ilang assessment, 237 ka square meters sa lugar ang maapektuhan sa proyekto, ug lakip usab niini ang 143 ka square meters nga yuta sa usa ka korporasyon.

Gipahibawo nga aduna nay unang miting nga gihimo aron hisgutan ang mga isyu bahin sa maapektuhang yuta.

Sa maong miting, nauyonan nga aron makapadayon ang maong imprastruktura nga proyekto sa gobyerno, ang maong korporasyon mopirma og usa ka Right-of-Way Agreement with Usufruct* uban sa DPWH, diin ang DPWH ug opisina niini ang mahimong usufructuary para sa 143 ka square meters nga bahin sa yuta — nga gikinahanglan aron masugdan ug maimplement ang proyekto.

Gipasabot ni Villa nga subay sa Department Order No. 712, Series of 2025. ang mga proyekto ubos sa Basic Infrastructure Programs (BIP). sama niini, kon mahuman na, ipasa kini ngadto sa Cebu City Government.

Ang City Government sa Cebu mosugot sa pagdawat sa proyekto aron masiguro ang hustong pagmintinar, pag-atiman, ug pag-ayo niini kung gikinahanglan.

Giklaro usab nga ang Right-of-Way Certification gamiton na karon sa tanang local infrastructure projects aron masiguro ang uniformity ug accountability sa ilang pagpatuman.

Kini nga certification pirmahan sa City Mayor, nga awtorisado pinaagi sa usa ka Sangguniang Resolution ug i-verify ug i-endorso sa DPWH.

Sa labing bag-ong sesyon sa konseho, wala dayon gihatagan og go signal ang mayor nga mopirma sa kasabutan.

Una niini, gipangayo una sa konseho ang mga sugyot ug komentaryo gikan sa Committee on Infrastructure sa City Council, SRP Management Office, Cebu City Planning and Development Office (CCPDO), ug labi na sa City Legal Office kabahin sa draft sa Right-of-Way Agreement. — /MEL (BANAT NEWS)