Mga mayor nanawagan sa pagtapos sa korupsiyon

CEBU, Philippines — Nakighiusa ang mga mayor sa kalungsoran sa Probinsiya sa Sugbo sa pag-awhag sa Department of Public Works and Highways (DPHW) ug sa ubang ahensiya sa gobiyerno nga ibutyag ang tanang project details sa mga flood control project sa nasud. Ang Mayors of Good Governance nipagawas og pamahayag pag-awhag sa pagbutyag sa tinuod ug accountability lakip sa hustisya sa alegasyon sa halapad nga korupsiyon kalabot sa mga flood control project ug ubang proyekto sa imprastraktura.

Ang League of the Municipalities in Philippines (LMP) Cebu Chapter nasayod nga walay mga mayor sa probinsiya nga nipirma sa maong pamahayag sa Mayors of Good Governance, kini tungod kay mas gipili sa LMP-Cebu nga mopagawas og lahi nga pamahayag.

"Let there be no doubt. We share the same conviction. We too demand transparency, accountability, and justice behind these corruption allegations, including the reported collusion between certain government officials and favored contractors", tipik sa pamahayag sa LMP-Cebu gipangulohan  ni Cordova Mayor Cesar "Didoy" Suan.

Nakighiusa ang grupo sa awhag ngadto sa DPWH nga ipakita ang tanang detalye sa mga proyekto lakip na ang program of works, detailed unit price analyses, bill of quantities, feasibility studies ug ang mga pangalan sa mga contractor ug mga politiko nga nalambigit.

Matud sa mga mayor sa probinsiya isip mga lokal nga lider nasayod sila sa epekto ug pag-antos sa mga residente niini sa mga pagbaha ug pagdihili sa yuta panahon sa ting-ulan.

Ang maong mga flood control projects dako unta og matabang sa publiko, hinungdan nga niawhag ang LMP-Cebu nga kinahanglan nga matapos na ang korupsiyon sa maong mga proyekto sanglit ang maong sestema dili lang makonsidera nga pangawat sa pundo sa gobiyerno, pangawat usab kini sa kaluwasan, dignidad ug paglaom sa mga konstituwente.  Ang maong pamahayag sa LMP-Cebu gipirmahan sa sobra 40 ka mayor sa mga lungsod sa Probinsiya sa Sugbo.