Nag-operate og swertres sa Carcar ug Barili gidakop

CEBU, Philippines — Gipanghipos ang magtiayon ug usa ka indibidwal nga nagpaila nga lehitimong tigpataya og swertres didto sa Dakbayan sa Carcar ug lungsod sa Barili niadtong miaging adlaw.

Sa lungsod sa Barili, usa ka alyas Jason ang gisikop didto sa Barangay Poblacion human kini nasakpan nga nagpataya og ilegal nga swertres.

Giingon nga siya ang nagdala og dokumento nga sila lehitimong magpataya sa swertres ubos sa LC Group Gaming and Amusement Corp.

Samtang gisikop sab ang magtiayon nga sila si alyas Marlon, 37 anyos ug si alyas Mary, 37 anyos didto sa sitio Caipilan, Barangay Poblacion 1, Siyudad sa Carcar.

Nipagawas og pamahayag ang King Dragon Amusement Corporation nga sila ang lehitimo nga adunay otorisasyon gikan sa Philippine Charity Sweepstakes Office (PCSO) nga maoy nag operate sa Small Town Lottery (STL) sa probinsya sa Sugbo, walay labot ang siyudad sa Sugbo, Mandaue ug Lapu-Lapu.

Sigon pa sa King Dragon Amusement Corporation nga walay kamatuoran ang nanggawas nga estorya nga ang ilang lisensya gikanselar ug sila pahunongon na sa operasyon.

Ilang gihulagway nga pulos pagpanglawgaw ang nikatap nga impormasyon aron sa paglibog sa mga tawo.

Si Atty. Medel Hyacinth Herrera-Ramos, branch head sa PCSO Cebu nibutyag nga walay lain nga gi authorize sa ilang buhatan sa pagpadagan sa STL kundi ang King Dragon Amusement Corporation lang.

Iyang giangkon nga naabot na sa ilang buhatan ang nikatap nga peke nga dokumento nga gihimo sa mga dinakpan.

Gani ila na kining gipaabot ngadto sa ilang ulohan nga buhatan aron mao nay mohimo og pamahayag labot niini.

Niawhag ang opisyal sa katawhan nga anha lang mosusi sa ilang social media page kada bola sa duwa kung unsa ang lehitimo nga nagpagdagan sa STL. (BANAT NEWS)