Snatcher nanglabni og cellphone sikop

CEBU, Philippines — Nabalhog sa prisonan ang usa ka snatcher human kini nadakpan dihang nanglabni og cellphone sa pasahero sa usa ka jeep pasaheroan sa may Natalio Bacalso Avenue, Barangay Basak Pardo, Dakbayan sa Sugbo kagahapon sa kadlawon.

Ang suspetsado mao si Renante Rey James Librado, 34-anyos, nagpuyo sa Kawayanan, Barangay Lagtang, Dakbayan sa Talisay.

Ang biktima mao si alyas “Mari” 34, call center agent, taga Barangay Lawaan, Dakbayan sa Talisay.

Base sa taho sa Inayawan Police Station sa Cebu City Police Office nga ang suspetsado ug biktima parehong sakay sa PUJ gikan sa Dakbayan sa Talisay paingon sa Dakbayan sa Sugbo.

Apan pag-abot diha sa lugar nga nahitaboan gikatahong kalit nga gilabni sa suspetsado ang cellphone sa biktima nga Samsung Galaxy A52S nga nagkantidad og P18,000 ug nilayat gikan sa jeep.

Pinaagi sa tabang sa ubang PUJ driver ug conductor gigukod nila ang suspetsado ug nadakpan ug na-recover usab ang cellphone sa biktima.

Ang suspetsado mag-atubang og kasong pagpangawat. BDB BANAT NEWS