Rehab program sa Mandaue City Jail malamposon

CEBU, Philippines — Malampuson ang gipasiugdahan nga Male Dormitory Jail-Based Rehabilitation Program Moving Up Ceremony sa Mandaue City Jail nga gipahigayon niadtong Miyerkules Agosto 20, 2025.

Kini ang giapilan sa 27 ka mga Persons Deprived of Liberty (PDL) nga hingpit gayod nga migradwar sa mga skills nga ilang gibansaybansay.

Gihimo ang maong programa alang sa pagtubag sa mga panginahanglan sa mga PDL’s nga anaa sulod sa Mandaue City Jail nga nalambigit sa paggamit sa illegal nga drugas nga sa ilang paggawas ug pagtipon og balik sa kumunidad mahingpit na ang ilang pagbag-o sa kinabuhi.

Naglakip sa mga gihimong pagbansaybansay mao ang pagtudlo kanila og mahimo nilang kapanginabuhian ug makatabang na kini sa ilang tagsa-tagsa ka pamilya.

Mitambong usab sa kalihukan mao ang mga sakop sa Mandaue City Anti-Drug Abuse Council (MCADAC) ug uban pa nga mga opisyal sa kagamhanan. (BANAT NEWS)