DSWS nabalaka sa pagsaka sa mga bayolente nga insidente
CEBU, Philippines — Nipadayag og kabalaka ang Cebu City Department of Social Welfare and Services (DSWS) sa pagsaka sa mga bayolente nga insidente nga naglambigit sa mga menor de edad ilabi na kadtong adunay kalambigitan sa gang.
Matud ni Portia Basmayor, pangulo sa DSWS nga daghang kaso kalabotan sa tinguha sa mga menor nga mahimong viral sa social media ug makakita dayon og kwarta bisan pa og kini nagbutang sa peligro sa kinabuhi sa uban lakip na sa ilang mga kauban.
Ang maong pamahayag ni Basmayor subay kini sa nikatap diha sa social media nga mga video nga nagpakita sa grupo sa mga menor nga niabuso og laing menor nga nagpanuigon og 14-anyos.
Base sa pasiunang nga imbestigasyon sa DSWS posible nga giplano kini nga insidente aron makadani og atensiyon diha sa online.
Kompirmado ni Basmayor nga nagpatuman na og intervention ang ilang buhatan aron masulbad ang maong isyu.
Giawhag usab sa DSWS ang mga ginikanan, komunidad, ug lokal nga mga lider nga magpasiugda sa aktibong paggiya ug pagbantay sa online nga kalihokan sa mga bata. (BANAT NEWS)
- Latest




















