Pagpasulod og baboy sa dakbayan sa Sugbo estriktohon

CEBU, Philippines — Gisugyot ni Konsehal Pastor “Jun” Alcover Jr. nga pahugtan pa ang ang pagpasulod og baboy sa Dakbayan sa Sugbo aron dili matakdan sa African Swine Fever ang mga baboy sa syudad ug maprotihian ang mga backyard piggery.

Nipadayag og kabalaka si Alcover sa dihang gilibkas na ni Gobernador Pamela Baricuatro niadtong Hulyo 3, 2025 ang pagdili sa pagsulod sa baboy gikan sa laing mga probinsya ng apetakdo sa ASF.

Matud pa ni Alcover nga makapabalaka ang bag-ong mga taho nga nagpakita gihapon sa presensya sa ASF sa nagkadaiyang probinsya sa Pilipinas ilabi na sa Bohol nga kasikbit nga probinsya sa Sugbo diin sa miaging semana lang, gatusan ka mga baboy ang nangamatay tungod sa ASF.

Nakasabot si Alcover sa rason sa gobernadora sa paglibkas niini aron nga mapagaan ang mga konsumidor sa mga palaliton.

Apan kinahanglan sab nga estriktuhon ang mga pasudlon nga baboy sa syudad gumikan kay kung daghang baboy ang mamatay tungod sa ASF, dako og posibilidad nga mokunhod ang produksiyon sa baboy ug motaas ang presyo niini sa mga merkado. Gihangyo ni Alcover ang buhatan ni Mayor Nestor Archival Sr. sa pagluwat og Executive Order ug pagsagop sa mga

guidelines subay sa DA Administrative Circular No. 02 aron mapugngan ang ASF nga makasulod sa Sugbo.

Gihangyo sab niya ang buhatan sa Department of Veterinary Medicines and Fisheries (DMVF) sa pagpahigayon ug tigom sa tanang stakeholders nga nalambigit sa industriya sa baboy. MEL BANAT NEWS