63 anyos nga lalake nakit-ang patay

CEBU, Philippines — Usa ka patay'ng lawas sa lalake ang nakit-an sa may Purok Makugihon, Barangay Punta, Lungsod sa San Remigio pasado alas 7 kagahapon sa buntag, Domingo, Agosto 17, 2025.

Ang biktima mao si Severino Ancao Canama Jr., 63 anyos, nagpuyo sa nahisgutang dapit. Una niini, ang San Remigio Municipal Police Station nakadawat og tawag labot sa nakit-an nga patay'ng lawas sa tawo sa dapit ug dali nila kining girespondehan.

Nasayran sa kapolisan ang ig-agaw sa biktima nga si Joseph Gelig maoy nakakita sa biktima sa backyard garden nga wala nay kinabuhi.

Nagkanayon si Police Captain Jan Ace Elcid Layug, Hepe sa San Remigio Municipal Police Station nga sa ilang inisyal nga imbestigasyon posible napandol, natumba ug wala na nakabangon ang biktima tungod kay hubog kini sanglit fiesta sa Barangay Punta niadtong Sabado ug giingong tibuok adlaw kini nag-inom.

Pagsusi sa lawas sa biktima wala'y nakit-an nga laing injury gawas lang sa gamay nga samad dapit sa tiil niini.

"Nakit-an siya kay buntag naman gyud kay fiesta man didto sa Barangay Punta, wala gyud nakamata og sayo ang mga tawo, nakit-an siya around 8am didto sa murag garden man to siya'y tigguna didto", suma pa ni Police Captain Layug.

Dili makasulti ang kapolisan nga napantok ang biktima tungod kay sa inisyal nga paghiling sa lawas niini wala'y nakita nga dugo o samad.

Dili na sab nila kini makompirmar kay ang pamilya sa biktima dili na magpa autopsy sa patay'ng lawas.

Gisusi sab sa kapolisan ang posibilidad nga kini gikawatan apan sa paghiling sa bulsa niini naa ra ang iyang kwarta. — /MEL (BANAT NEWS)