Gitabangan og kulata

CEBU, Philippines — Usa ka 21-anyos nga lalaking adunay sakit nga epilepsy ang gitabangan og kulata sa 12 ka mga menor de edad diha sa Sitio Mahayahay 1, Barangay Calamba, siyudad sa Sugbo niadtong Agosto 9, 2025 nga nakuhaan og video ug gi-post sa social media ug mi-viral.

Sa viral video makita ang 21-anyos nga biktima nga naghigda ug nagtabon sa ulo sa dihang kalit kining gitabangan og sumbag ug giyatak-yatakan sa maong mga menor de edad.

Makita sab ang usa ka hamtong nga lalake nga apil sa mikulata ug misakay dayon kini sa iyahang e-bike.  Nakaangkon og bun-og sa lawas ang biktima ug gani ang iyahang mata na black eye.

Ang biktima miingon nga igo ra niya gibadlong ang mga batan-ong nangabot ug nagtapok sa ilahang dapit apan gilabay siya og bato hinungdan nga nasuko siya ug iyahang gigukod.

Wala damha nga gibalikan siya sa mga batan-on  ug nagdala na og mga hamtong. Nidagan ang biktima apan natumba hinungdan nga naabtan siya ug diha na siya gitabangan og kulata.

Giangkon sa biktima nga miyembro siya og gang ug ang mga batan-on mga sakop sa karibal nila nga gang.

Gumikan sa maong panghitabo ang Gender and Development(GAD) sa Barangay Calamba nipatawag sa mga nalambigit niadtong Huwebes sa gabii, Agosto 14, 2025 ug nag-atubangay.

Niabot sa 12 ka mga lalake ang nagkulata sa biktima, ang lima niini taga Barangay Calamba samtang pito ang taga Barangay Labangon.

Si Analiza Ewayan GAD Focal sa Barangay Calamba miingon nga dili PWD ang biktima apan duna kini epilepsy.

Nahibaw-an sab nila nga ang biktima maoy nanguna matod pa sa paggukod sa mga batan-on nga igo lang namalit og fried rice. Nangangkon sab sila nga ilaha kining gitabangan og kulata kay nagtuo sila nga duna kini hinagiban.

Samtang kadtong hamtong nga lalake nga nisakay og e-bike giingong maguwang sa usa sa mga menor de edad.

Sigon sab sa GAD Focal nga init og ulo ang biktima ug daling masuko, gani sa miaging tuig lang kini nakagawas sa bilangguan tungod sa kasong frustrated murder.

Apan si  Kapitan Ester Concha sa Barangay Calamba nagtinguha nga pasakaan og kaso  silang tanan aron sila patagamon.

Matud pa ni Concha samtang dili PWD ang biktima nabantayan niya nga dili magkatukma o dili pare-parehas ang tubag niini sa mga pangutana.

Ang biktima gisagop sa uyoan kinsa mitug-an nga moikyas ni pirme sa ilaha.

Si Concha miingon nga ang maong kagubot  sumpay kini sa gubot duha ngadto sa tulo ka semana na ang nakalabay sa dihang gigukod sa biktima nga nagbitbit og “samurai” ang mga bata nga naa sa 13 ngadto sa 15-anyos ang pangidaron.

Sa dihang gipangutana ni Concha ang biktima gihimakak niini nagdala kini og samurai, apan usahay moangkon nga nagdala siya niini maong gusto niyang ipaubos kini og psychiatric evaluation.

Mokonsulta si Concha sa DSWS ug sa abogado kung unsay angay nga buhaton kay dili kini unang hitabo nga nalambigit sa kasamok ug kagubot ang maong mga menor de edad  mao nga gusto niya silang pasakaan og kaso aron maleksyon.

Nunot sa maong hitabo, gihangyo sa kapitan ang mga ginikanan nga magtinabangay sa paghipos sa ilang mga bata ilabi na lapas sa alas-10 sa gabii. Si Portia Basmayor, ang pangulo sa DSWS nibutyag nga magestorya  pa sila sa kapitan ug mga gad focal sa duha ka barangay aron ilang hisgutan ang final nga rekomendasyon batok sa mga nalambigit sa rambol. Rowena D. Capistrano, IBM BANAT NEWS