17 Bohol officials gitaktak

CEBU, Philippines — Gimando sa Office of the Ombudsman ang pagtangtang sa serbisyo sa 17 ka opisyales sa gobiyerno tungod sa kontrobersiya sa pagtukod ug pag-operate sa Captain’s Peak Resort sa sulod sa protected Chocolate Hills Natural Monument (CHNM) sa lungsod sa Sagbayan, Bohol.

Ang desisyon penetsahan og Marso 12, 2025 apan napirmahan lang ni Ombudsman Samuel Martires sa miaging buwan nag-ingon nga ang maong 17 ka opisyales guilty nga nakahimo og grave misconduct and gross neglect of duty, tungod sa pag-isyu permits ug clearances bisan og wala makapakita og mandatory environmental documents ang resort sama sa Environmental Impact Assessment (EIA), Environmental Compliance Certificate (ECC), and Special Use Agreement in Protected Areas (SAPA). “The 2018–2022 PAMB TWG members and DENR 07 officials, namely: Jose Douglas Berenguel, Ceferino Tajo, Betsy Jumamoy, Lito Bonajos, Maria Fe Jala, Rogaciana Caduyac, Adelo Mangaya-ay, Tito Ancog, Paulino Amodia, Laurentino A. Bautista, Lorna Fernandez, Ariel N. Rica, Paquito Melicor, and Gilbert Gonzales are hereby meted the penalty of dismissal from the service for Gross Neglect of Duty.”

Si Melicor mao ang DENR Regional Executive Director ug PAMB chairman niadtong 2022 samtang si Gonzales  maoy naghupot sa maong posisyon niadtong 2018.

 “Similarly, Sagbayan Officials Restituto Q. Suarez III(mayor), Maximo G. Lomosbog(zoning officer), and Alan Dinoy (building official) are hereby meted the penalty of dismissal from the service for Grave Misconduct,” matud pa sa decision.

Apil sa silot nga gipahamtang kanila ang cancellation of eligibility, forfeiture of retirement benefits (except accrued leave credits), and perpetual disqualification from reemployment in government service. Kun wala na sila sa serbisyo, pamultahon sila og bali’g usa ka tuig nila kaniadto nga sweldo.

Kahinumdoman nga niadtong Mayo 22, 2024, gipaubos sa preventive suspension si Bohol Governor Erico Aristotle Aumentado ug 68 ka lokal nga opisyal aron dili sila makaimpluwensiya sa imbestigasyon batok sa  gitukod nga resort.

Si Aumentado kinsa gi- reprimand ug gipakasohan og kasong kriminal mipagawas og pamahayag bahin sa desisyon ug mipasabot sa iyang posisyon.

“Ubos sa administrative domain, ako, uban sa pipila ka mga mayor, gihatagan lang og badlong,” matud ni Aumentado.

“Ubos sa kriminal nga aspeto, ang Office of the Ombudsman nimando sa pagpasaka og kasong kriminal nga kalapasan sa Section 3(e) ug Section 3(j) sa R.A. 3019, batok kanako, duha ka kanhi gobernador, ug uban pang mga respondents. Hingpit ako sa akong baroganan nga wala ako nakalapas sa bisan unsang balaod sa ani nga kaso,” dugang pa niya.

Ang gobernador uban sa mga gikasohan gikatakdang moduso og Motion for Reconsideration tungod kay wala siyay gihimong kalapasan sa balaod, gani siya pay nimando pagpahunong sa konstruksyon ug operasyon ug paghimo og imbestigasyon sa Captain’s Peak human nibuto ang kontrobersiya niadtong tuig 2023.

Matud pa sa Ombudsman ang pagtukod ug operasyon sa maong resort nakaguba sa Chocolate Hills nga usa ka kalapasan sa National Integrated Protected Areas System (NIPAS) Act and the Expanded NIPAS Act.

Ang kontrobersiya napublikar human sa gihimong investigative report sa grupo sa mga tigbalita sa The Freeman niadtong 2023 mahitungod sa maong resort diha sa protected Chocolate Hills. Mitchelle Palaubsanon sa The Freeman, IBM BANAT NEWS