Pagsaulog sa Sinulog hingpit nga gipangandaman

CEBU, Philippines —  Anaa palang sa tunga-tunga nga bahin sa Agosto apan subsob na ang pagpangandam sa Dakbayan sa Sugbo alang sa Sinulog Celebration para sa sunod nga tuig ug dunay usa ka kabag-ohan ang ipatuman sa unang higayon.

Sulod sa unang higayon ang balaan nga bata kay mahimamat sa mga deboto atol sa ipahigayon niini nga suroy-suroy sa kabarangayan.

Ang imahen sa Balaang Bata gikan sa Basilica, mosuroy sa mga barangay sa Dakbayan sa Sugbo sa tinguha nga makaabot kini sa mga deboto nga dili makahimo sa pagduaw sa simbahan sa Basilica tungod sa kakulian sa panglawas, sumala pa ni Konsehal Dave Tumulak.

Gitug-an usab ni Tumulak nga makig-alayon siya sa Committee on Peace Order nga gipangulohan ni Konsehal Paul Labra aron sa pagseguro nga magmalinawon ang kasaulogan. Kini aron dili usab maghuot ang siyudad ug ang mga kalihukan sa Sinulog ipahigayon sa mga nagkadaiyang dapit sama sa SRP, Fuente Osmeña, Plaza Independencia ug uban pa.

Ang konsehal nitug-an nga sa Cebu City Sports Center gihapon ang Sinulog Main Event.

Gipaneguro usab sa konsehal nga mabayran ang mga tawo nga moserbisyo sa mga kalihukan sa Sinulog sunod tuig.