Nangilog og armas napusilan

CEBU, Philippines —  Usa ka lalake nga giingong nagumon sa ilegal nga drugas ang napusilan human kini nangilog  og armas sa polis  diha sa Sitio Cumpang 3, Barangay Tayud, Lungsod sa Liloan kagahapon sa kadlawon, Martes, Agosto 12, 2025.

Ang suspek mao si Richard Tagalog, 44,  giingong usa ka drug addict ug nagpuyo sa Sitio Cumpang 3, Barangay Tayud, Lungsod sa Liloan.

Sa imbestigasyon sa Liloan Municipal Police Station nakadawat sila og tawag gikan sa concerned citizen mahitungod sa tawong nag-wild.

Matud pa sa kapolisan, basi sa pamahayag sa mga tawo sa lugar sabog sa ginadiling drugas ang suspetsado.

Ni-responde dayon ang kapulisan ug sa pag-abot sa area ang polis nga si Police Staff Sergeant Ronald Galo nagpaila  sa iyang kaugalingon ug giduol ang suspetsado.

Gisuwayan kini og pakalma nga giingong nawad-an na sa saktong pangisip tungod sa drugas apan giingong ni-demanda kini kang Galo nga huwaman ang iyahang M16 rifle.  Niatras ang polis tungod kay giingong dili na masabtan ang linihukan sa suspek apan diretso siya gisumbag  niini

Gumikan sa hitabo ang kaubang polis miduol sa suspek aron makalma apan siya na sab matud pa ang gisumbag ug gisuwayag ilog ang iyang armas.

Nakalikay kini apan gisumbag na sab sa suspek si Galo ug naigo sa nawong hinungdan nga natumba.

Diha na nahitabo ang linayugay sa suspek ug ni Galo kay gusto gusto niining kuhaon ang iyang armas , tungod niini gipusil sa laing polis ang wala nga paa sa suspetsado.

Ayha pa kini naposasan ug gidala sa Danao City District Hospital apan gibalhin sa Vicente Sotto Memorial Medical Center.

Kasong direct assault ug resistance and disobedience to a person in authority ang ipasaka batok sa suspetsado.(BANAT NEWS)