Duha ka language learning centers gipadlakan sa DMW

CEBU, Philippines — Gipadlakan sa Department of Migrant Workers ang duha ka mga Language Learning Center sa Lungsod sa Minglanilla ug sa Dakbayan sa Sugbo, tungod sa matud pa illegal recruitment.

Ang DMW unang nirumbo sa usa ka Japanese Learning Center nga nahimutang sa ikaupat nga andana sa usa ka balay patigayon nga nahimutang sa may Barangay Linao-lipata sa Lungsod sa Minglanilla.

Naabtan sa operating team samtang nagpahigayon og klase sa dili mominos walo ka mga tinun-an ang maong center.

Usa sa mga nahinabi nga babayeng tinun-an, nibutyag nga unom ngadto sa siyam ka buwan ang ilang pagtuon, nga mobalor og P72,000 nga ilang bayran og tag P3,000 kada buwan.

Ang maong tinun-an gipasaligan nga makatrabaho sa Japan kun makat-on na sila og Japanese Language.

Matud pa sa tag-iya sa maong building Myrna Obejeres, ang tag-iya sa maong tulonghaan atoa sa Japan ug nag-abang lang kini sa iyaha sulod na sa usa ka tuig ug upat ka buwan, apan duha ka buwan na silang nipalta  sa abang. Ang Business Permit and Licensing Office sa Lungsod sa Minglanilla miingon nga walay business permit ang maong learning center ug kaduha na nila kini napadad-an og notisya.

Sumala pa ni John Niño Caparas, BPLO Staff, karon semanaha padalhan na usab unta nila og closure order.

 Samtang pasado ala una sa hapon sa susamang adlaw lunes August 11, 2025 laing language learning center usab sa Barangay Cogon Ramos sa Dakbayan sa Sugbo ang gipasirad-an sa DMW.

Apan ang tag-iya nipasabot nga wala silay recruitment ug  mga pasalig nga palargahon ang ilang mga tinun-an.

Dugang pa sa tag-iya aduna hinoon silay mga kaila nga ilang i-refer ang maong mga tinun-an nga sa tan-aw nila mga lehitimo.

Apan si Atty. Eric Dollete, director sa Migrant Workers Protection Bureau, nibutyag nga adunay kalapasan ang maong center nga illegal recruitment by referral.

Dugang pa ni Dollete, bisan pa man og walay mga mobarug nga biktima sa maong learning center sila sa DMW mahimo nga makapasaka og kaso.

Mahimo usab unya nga marekomendar sila sa blacklist ug dili na maapil sa accredited nga mga learning centers.

Sumala pa ni Jhoaden Lucero, Director sa DMW-7, sulod sa pipila ka buwan nilang gipaubos sa surveillance ang maong duha ka centers ug nakita nila ang mga kalapasan, hinungdan natigayon ang maong operation.

Ang mga biktima sa maong mga learning center giawhag nga mobisita sa buhatan sa DMW aron sila matabangan.

Ang maong mga buhatan maoy ikatulo ug ikaupat nga gipasirad-an sa DMW karon tuiga. (BANAT NEWS)