2.5 kilong shabu nasakmit

CEBU, Philippines — Nadakpan sa hiniusang operasyon sa ang usa ka regional level high value individual ug nasakmitan og kinilo sa ilegal nga drugas sa ilahang buy-bust operation sa Sitio Uniwide, Barangay Tipolo, Dakbayan sa Mandaue pasado ala-9 sa gabii niadtong Sabado, Agosto 9, 2025.

Ang nasikop mao si Ian Mark Rosales Velasquez alyas Cali, 35, nagpuyo sa Sitio Nawanao, Barangay Pit-os, siyudad sa Sugbo.

Nasakmitan ang suspetsado og 2.5 kilong gituohang shabu nga nagkantidad og P17 million.

Ang operasyon gihimo sa City Intelligence Unit/City Drug Enforcement Unit Mandaue City Police Office, Regional Intelligence Division(RID)-7, Regional Police Drug Enforcement Unit(RPDEU)-7, Special Operations Unit(SOU)-7 PNP Drug Enforcement Group ug Philippine Drug Enforcement Agency(PDEA)-7.

Sa impormasyon sa kapulisan ang suspetsado bodegero ug tighatod matud pa sa illegal nga drugas.

Giingong P15,000 ang suhol sa suspetsado sa paghatod sa mga drugas ug giingong usa ka tuig na niya kini gihimo.

Usa ka buwan nga gi-monitor sa kapulisan ang illegal nga kalihukan sa suspetsado. Giingong maka-dispose kini og upat ka kilo nga shabu kada buwan.

Ang area of disposal niini kay Mandaue City ug Cebu City.

Kasong kalapasan sa Section 5 ug 11, Article II sa Republic Act 9165 ang ipasaka batok sa suspetsado.

Sa Dakbayan sa Talisay nadakpan sa managlahing lugar ang tulo ka mga gidudahang nalambigit sa ilegal nga drugas. Unang nadakpan mao si alyas Crissan didto sa sitio Riverside, Barangay Lawaan 3 niadtong Biyernes sa 1:20 sa kadlawon.

Mga alas 2:25 sa kadlawon, nasikop si alyas Raven, 31, didto sa Laray, Barangay San Roque. Samtang nasikop sab si alyas Honeydy, 37, diha sa sitio Pungsod, Barabgay Lawaan 3 mga alas 4:30 sa kadlawon.

Ang mga dinakpan nakuhaan og gagmay nga pakite sa shabu diin alang sa ilang konsumo. — Gabriel Bonjoc/IBM (BANAT NEWS)