Gisukmag patay

CEBU, Philippines — Gitanggong karon sa detention cell sa Presinto 1 sa Mandaue City Police Office (MCPO) ang usa ka libudsuroy human niya napatay ang laing libudsuroy pinaagi sa sumbag.

Ang insidente nahitabo sa dalan A. del Rosario sa Barangay Guizo sa Siyudad sa Mandaue alas 11 pasado ang takna sa miaging Sabado sa gabii, Agosto 9, 2025. Giila sa kapolisan ang biktima nga mao si Dave Maglasang samtang ang suspek giila nga si John Rey Lopez. Ang duha pulos anha magkatulgan sa aseras sa maong lugar, apan nasayran sa kapolisan nga ang namatay taga Sitio Pilit sa Barangay Cabancalan sa maong siyudad .

Sa imbestigasyon ni Police Sergeant Michael Codaste sa Presinto 1 sa MCPO, nga sayo anang adlawa nagkalalis ang duha nga misangpot sa ilang pagsinumbagay.

Ug nianang pagka gabii giduol sa suspetsado ang biktima ug gikalitan sukmag hinungdan sa pagkasukarap niini ug nakabsan sa kinabuhi.

Dali hinuon nga nadakpan sa kapolisan ang suspetsado ug gibalhog kini sulod sa detention cell ug gikatakdang pasakaan og kaso. — /IBM (BANAT NEWS)