Lalaki nga magdala-dala og armas sikop
CEBU, Philippines — Gitanggong karon sa kapolisan sa Presinto 4 sa Mandaue City Police Office (MCPO) ang usa ka 47-anyos nga lalaki nga gidakop sa kapolisan tungod sa paghupot og armas nga walay lisensiya diha sa Sitio Sampaguita, Barangay Banilad, Siyudad sa Mandaue.
Gikataho nga ang mga residente sa lugar nireklamo ngadto sa kapolisan batok kang alyas “Digoy” tungod kay kanunay kining magdala sa iyang armas.
Si Police Major Mark Navales, hepe sa kapolisan sa Presinto 4 nagkanayon nga nakadawat sila sa maong reklamo ug dali silang ni-apply og search warrant ngadto sa korte batok sa suspetsado.
Dala ang search warrant gisiksik sa mga polis ang lawak sa panimalay nga gipuy-an sa maong suspetsado.
Nakuha sa kapolisan ang armas nga kalibre .45 nga walay lisensiya uban sa tulo ka buhing bala ug ang suspetsado nga diha sa ilang panimalay niadtong higayona ang ilang gidakop.
Ang suspetsado natingkagol karon sa detention cell sa Presinto 4 sa MCPO ug gikatakdang pasakaan og tukmang kaso sa kapolisan sa nahimo niining kalapasan karong adlawa.
Gisusi usab karon sa kapolisan ang maong armas pagpiho kong wala ba kini magamit sa nahitabong krimen nga naglakip sa pagpamusil, pagpanulis ug uban pa. — /BDB (BANAT NEWS)
- Latest
