Help desk ug hotline ibutang sa probinsiya sa sugbo

CEBU, Philippines —  Duha na karon ang help desk sa Probinsya sa Sugbo nga maoy motabang sa pagtubag sa mga concerns sa mga Sugboanon.

Kini human si vice governor Glenn Anthony Soco mianunsyo sa pag establisar og 24/7 hotline ug help desk nga maghatag og direktang linya sa provincial government.

Gikan sa legal aid, medical support, o burial assistance, mamahimong mapangayoan og assistance pinaagi sa hotline sa buhatan sa bise gobernador nga ilusad karong Agosto 11.

Matud ni Soco nga ilang gihan-ay ang ilang serbisyo ngadto sa mga konstituwente sa probinsya diin ang publiko mamahimong makadirekta og padangat sa ilang concerns ug mahatagan dayon og tubag o tabang sa Kapitolyo.

Dugang ni Soco nga ang maong help desk mo coordinate usab sa mga board members sa pito ka distrito ug ubang ahensya sa gobyerno.

Ang maong help desk adunay ibutang nga staff member aron maoy mogiya ug motabang sa pagpaabot sa concerns sa mga Sugboanon. Aron mas epektibo kini adunay kaugalingong opisina ang maong help desk ug personnel ingon man budget.

“This is a fully functioning office—equipped with personnel, a budget, and the influence and connections needed to collaborate with both local and national government agencies,” matud ni Soco.

Aduna usab Facebook page nga himoon aron mamahimomg adto ipadala ang mga mensahe ug online inquiries.

 Ang maong anunsyo ni Soco gihimo pipila ka semana human nga miluwat og executive order si gobernador Pamela Baricuatro nga nag-establisar og Cebu People’s Action Center (CPAC).

Ang CPAC adunay kaugalingong 24/7 hotline, usa ka official website alang sa ticketing ug feedback, ug mobile application nga mo feature og real-time tracking, push notifications, ug geotagged reporting. (BANAT NEWS)