Vlogger gikasohan, 'snatching' dili tinuod
CEBU, Philippines — Usa ka vlogger ang gikasuhan og kasong kriminal niadtong Agosto 7, 2025 human gi-post sa social media ang usa ka video nga makita ang mga lalake sulod modern jeepney nagtinukmuray apan gipagawas matud nga usa kini ka snatching incident .
Nga daw buot niining ipaabot nga mensahe nga naghitak ang krimen sa Cebu nga naghatag og kahadlok ug kabalaka sa katawhan ug bati nga imahe sa rehiyon.
Ang maong video unang nag viral niadtong Hulyo 22, 2025 human kini gi-share sa usa ka radio station gikan sa orihinal nga post sa vlogger nga si alyas Jaissle. Dali dayon nga nihimo og imbestigasyon ang kapulisan ug nasuta sa ilahang validation nga ang insidente dili snatching kondili panaglalis lang kini ug nahitabo niadtong Mayo 8, 2025 sa Barangay Yati, Lungsod sa Liloan.
Ang reklamo gipasaka pinaagi sa regular filing sa Office of the City Prosecutor sa Cebu City sa mga personnel sa Regional Anti-Cybercrime Unit (RACU)-7 pinangulohan ni Police Lieutenant Joshua Cruz, Assistant Team Leader sa Cebu PCRT.
Gikasohan ang vlogger og kalapasan sa Article 154 sa Revised Penal Code (Unlawful Use of Means of Publication and Unlawful Utterances) subay na sa Section 6 sa Republic Act 10175 o Cybercrime Prevention Act of 2012.
Kun mapamatud-an nga nakasala ang vlogger mahimo kining mapriso og unom ngadto na sa 12 ka tuig gawas pa sa mga multa nga gipahamtang sa balaod.
Kun mopagawas ang korte og warrant of arrest ipatuman dayon kini sa kapulisan aron dakpon ang maong vlogger.
Si Police Regional Office (PRO)-7 Director Police Brigadier General Redrico Maranan kini nga "Hindi natin palalagpasin ang sinumang gumagamit ng social media upang magpakalat ng maling impormasyon na nagdudulot ng takot at kalituhan sa publiko. Ito ay nagsisilbing babala: may pananagutan ang sinumang lumilikha ng pekeng balita.”
Giawhag niini ang publiko nga magmabinantayon ug mahimong responsable sa pag-share og impormasyon sa social media ug makighiusa sa tinguha sa PNP nga mamentinar ang kahapsay ug kalinaw sa komunidad. IBM BANAT NEWS
- Latest
