Kadalanan sirad-an tungod sa Ironman 2025

CEBU, Philippines — Pipila ka mga dalan sa Lapu-Lapu City, Cebu City, Mandaue City ug Talisay City ang maapektahan tungod sa ipahigayong 70.3 Ironman 2025 sugod karong adlawa Sabado ug ugma adlaw nga Domingo, Agosto 9 ug 10, 2025.

Sa traffic advisory nga giluwatan pinaagi sa buhatan sa  City Traffic Management System sa Lapu-Lapu City , sugdan ang pagsirado ang dalan sa 4:00 ang takna sa kaadlawon hangtud kini sa alas  2:00 ang takna sa hapon.

Ang mga dalan nga makasinati og Full Road Closure sa Lapu-Lapu City mao ang rota alang lumba sa bisikita gikan sa  Barangay Punta Engaño motadlas sa  Mactan, Maribago, Agus, Marigondon , Subabasbas alang na sa paglahos na niini ngadto sa Lungsod sa Cordova.

Si Mario  Napule sa CTMS  miawhag sa mopaingon sa Mactan Cebu International Airport (MCIA) nga kinahanglang mosayo sila sa paggikan ug dili na kini magpaabot nga masirado na ang kadalanan.

Ang pagsirado  sa maong mga dalan pinasikad kini sa giaprobahan nga Ordinansa nga   City Ordinance No. 17-002-2025 tungod sa pag-host  sa dakbayan sa Ironman 70.3 sa Siyudad sa Lapu-Lapu sa  Agosto  9–10, 2025.

Sa Cebu City, ang Cebu City Transportation Office mipahibalo nga temporaryong sirad-an ang pipila ka mga dalan sa dakbayan ugma adlaw nga Domingo, Agosto 10, 2025 sugod sa alas 5:00 sa buntag hangtud na sa alas 12:00 sa udto alang sa Cebu City Leg Run of IRONMAN 70.3 nga gipasiugdahan sa Megaworld. Sakop sa maong kalihukan ang mga dagkong karsada lakip na ang South Coastal Road (CSCR) ug ang Cebu-Cordova Link Expressway (CCLEX) nga nagkinahanglan og temporaryong pagsira sa karsada ug pag-usab sa dagan sa trapiko sa mga nag-unang lugar sa syudad.

Ang apektadong mga dalan mao ang Cebu South Coastal Road (CSCR), CSCR Tunnel, CSCR Viaduct Bridge, SRP Viaduct Bridge Portion of D. Jakosalem St. nga duol sa Puso Village, F. Vestil St. sa SM Seaside, Sinulog Road, entrada sa City di Mare, guwaanan sa Nustar, ug CCLEX.

Temporaryong ipatuman sab ang two-way traffic sa pahabagatan nga karsada CSCR gikan sa El Pardo Junction paingon sa Cebu City–Talisay City Bridge.

Sa maong mga oras, hugtanon nga ipatuman ang truck ug bus ban sa mga apektadong karsada. Gipahimangnuan sab ang mga motorisata nga moagi sa alternatibong dalan aron nga makalikay sa paghuot sa dagan sa trapiko ug aron nga makatabang sa hapsay nga pagpahigayon sa dakong kalihukan.

Ang mga pagsira sa mga dalan ipatuman kini aron masiguro ang kaluwasan sa mga atleta ug sa kinatibuk-ang publiko sa panahon sa kalihukan. IBM BANAT NEWS