Mga bayot nag-showdown sa atop
CEBU, Philippines — Nangayo og pasaylo ang tulo ka sakop sa Lesbian, Gay, Bisexual and Transgender (LGBT) nga nag tumbling-tumbling sa atop sa usa ka imnanan sa Barangay Poblacion, Dakbayan sa Talisay.
Gibutyag ni Police Lt. Col. Maila Maramag, hepe sa kapolisan sa Talisay nga ilang gipatawag ang duha ka hamtong ug usa ka menor de edad nga mga LGBTs nga gireklamong nagtumbling-tumbling sa atop ug niresulta sa pagkaguba sa kagamitan sa imnanan.
Si Fe Gonzales, GAD Focal sa Poblacion nitataw nga nibungat og P410,000 nga danyos ang tag-iya sa imnanan kay naguba ang ilang atop, nangaputol ang linya sa internet, nangaguba ang bangko, lamesa ug uban pa.
Nagulhos-ulhos sa pagpatim-aw ang mga gipangita ug silang tanan nangayo og dispensa sa ilang nahimo.
Matud pa ni Maramag nga gipaabot pa nila ang reklamante kung mopadayon sa pagpasaka og kaso pero sigurado na ang ilang paghimo og public apology nga himuon diha sa social media ug paghimo sa community service.
Una niini, nagviral ang video sa mga LGBT kinsa nakainum og ilimnong makahubog nga giingong nabuntagan ug nagsayaw-sayaw.
Nagkalingaw sila sa pagsayaw apan nasobrahan sila kay nakaguba na og mga butang. Ang video sa ilang showdown nikatap sa social media nga nahimong viral apan ang uploader mi-delete niini.
Nagkanayon si Maramag nga kung moinum man og ilimnong makahubog sigurohon nga isulod kini sa tiyan ug dili sa utok. IBM BANAT NEWS
- Latest
