Pito gipamusil, lima naangol

CEBU, Philippines — Usa ka lalaki ang namusil sa Phase 1 Countryside Subdivision  sa Barangay Tayufd sa Lungsod  sa Consolacion alas 9  pasado ang takna sa miaging Martes sa gabii, Agosto 7, 2025 ug pagkahuman giingong nagpusil usab kini siya sa iyang kaugalingon.

Si Police Chief Master Sergeant Arnil Guc-ong, imbestigdor  sa Liloan Police  Station miila sa namusil nga si Jeffrey Cortes Jr., nagpuyo sa maong dapit ug giingong tiggamitan og ilegal nga drugas.

Matud pa ni Guc-ong unang gipamusil sa maong suspetsado sila si Anthony Panares,19;  Rene Lim, 27 ; pulos nagpuyo sa Barangay Flores Catmon, ug  Cerili Ouano, 42, nagpuyo sa Barangay Don Pedro Cue, Siyudad sa Bogo nga sakay og sakyanan.

Si Guc-ong miingon sa pag-agi nila sa tungod sa balay sa suspetsado kalit niya silang gipamusil. Maayo nalang walay naigo nila, apan sa kahadlok misutoy sila padung sa kapolisan.

Apan wala pa mohunong ang suspek kay miadto kini sa silingang balay ug  gipusil ang silingan ug naigo kini sa liog kinsa gidala sa Danao District Hospital.

Matud pang Guc-ong mibalik sa ilaha ang suspek ug pagkataud-taod nakadungog ang mga silingan og buto sa armas ug sa pagsusi sa mga tawo nakit-an ang suspek nga nagbuy-od na ug dunay samad pinusilan ug dali nila kining gidala  sa tambalanan.

Sa pikas bahin, upat ka tawo lakip na ang usa ka menor de edad ang nalandig sa tambalanan human sila gipamusil og giingong gun for hire diha sa diskohan sa Daruhan Drive, Purok Bayabas, Barangay San Roque, Dakbayan sa Talisay niadtong miaging kadlawon.

 Ang mga biktima nakaangkon og nagkalain-laing samad pinusilan sa ilang kalawasan. Ang nagrabehan mao si alyas John, nga padayon nga nagpaalim sa tambalanan.

Si Police Lt. Col. Maila Maramag, hepe sa kapolisan sa siyudad miingon nga dunay disko sa maong dapit anang tungora sa dihang naabot ang suspek nga si alyas Bobby.

Gikataho nga duna kini gipangita, apan wala didto ug ang gipahimungtan ang mga biktima hinungdan sa pag-alibwag sa mga tawo. Ang suspek dali sab nga miikyas.

Gituohan ni Maramag nga drug related ang motibo sa suspek tungod sa background niini kay usa kini ka gun for hire.— gGabriel Bonjoc/IBM BANAT NEWS