Nag-shopping apan wala mobayad

CEBU, Philippines — Nabalhog sa prisohan ang usa ka 23 anyos nga babaye nga giingong nag shopping og duha ka pares sa sapatos ug glass lid apan wala moagi og cashier sa usa ka mall sa Barangay Sto. Niño, siyudad sa Sugbo niadtong Lunes sa gabii, Agosto 4, 2025.

Ang dinakpan mao si alyas Jane, 23, (pangalan gipugngan sa kapulisan) nagpuyo sa Barangay Inayagan, dakbayan sa Naga.   Gikuha matud pa sa dinakpan ang Bluecamp Sneakers nga tag P999 ang usa ug glass lid nga tag P269 apan wala bayri sa cashier sa mall.

Giingong gibutang sa dinakpan ang gipanguha nga items sa usa ka plastic bag nga dunay logo sa maong mall ug nigamit kini og recycled nga resibo sa paggawas niya sa tindahan apan nasakpan gihapon kini  sa mga house detectives ug gitugyan sa Waterfront Police Station 3 Cebu City Police Office.

Sa laing bahinn, nasikop sa kapolisan sa Cordova ang usa ka lalaki nga giingon suspek sa pagpangawat. Nasikop kini atol sa gihimong follow-up operation nga gipangulohan ni Police Major  John Khale  Sanchez, Acting Chief of Police (ACOP) sa Cordova Police Station.

 Ang suspetsado nga si alyas Aloy (pangalan wala ibutyag sa kapolisan) nailhan  pinaagi sa CCTV footage ug sa tabang sa mga nagpakabanang residente sa Lungsod  sa Cordova maong dali siyang nasubay.

Sa nasayran nga gisulod ang panimalay sa magtiayong biktima sa Barangay Bangbang ug gisakiyo ang mahalong mga butang dayong sibat pahilayo. Nakamatikod ang pipila ka mga traysikad drayber sa paggawas sa maong kawatan gikan sa panimalay sa mga biktima ug nakumpirmar sa nakuha sa footage sa CCTV nga gilabyan niini. Pinaagi sa koordinasyon sa Cordova Municipal Police Station ug Lapu-Lapu City Police Station 4 ug sa wa magpailang informant dali nilang natultulan ang pinuy-anan sa suspek sa Sitio Kainsong, Barangay Basak, Siyudad sa Lapu-Lapu nga maoy hinungdan sad dali nga pagkasikop niini. Nabawi  gikan sa suspek ang usa ka backpack nga gipanag-iya sa biktima nga naglakip sa  mga ID ug mahinungdanong butang niini. IBM BANAT NEWS