Pepito naalarma sa IT system sa Cebu City

CEBU, Philippines — Naalarma si Konsehal Winston Pepito human nasayran ang problema sa information technology system sa kagamhanan sa Dakbayan sa Sugbo diin kuwang sa pormal nga istraktura, dili igo ang backup sa sestema, dili maayo nga mga kontrol sa pag-access ug posible nga adunay mga paglapas sa legal nga operasyon.

Gibutyag ni Pepito nga usa sa labing nakapaalarma kaniya mao nga wala’y tukma nga backup sa mga server karon.

Matud ni Pepito nga kon mapakyas ang main server mahimong hingpit nga maparalisa ang operasyon sa siyudad.

Labaw pa nga makahasol mao ang pagmentinar sa operasyon sa sestema nga gikataho nga nagsalig sa indibidwal nga mga programmer nga walay laing nasayod nga kawani bisan pa og gibuhat kini sulod sa buhatan sa kagamhanan.

Giangkon ni Pepito nga pipila ka mga programmer ang gikatahong adunay unrestricted access sa mga database servers diin risgo kini sa siguridad sa pribadong impormasyon.

Nadiskubrehan usab nga ang source code alang sa key systems gitipigan sa personal nga mga computer ug wala sa usa ka centralize repository.

Bisan pa nga adunay gisumiter nga mga kopya sa source code apan dili gihapon makompirma ni Pepito og magamit ug masaligan ba kini tungod kay wala pa kini mapaubos sa verification.

Gipahinumduman ni Pepito ang mga kawani sa siyudad nga tanang trabaho nga gihimo sulod sa kagamhanan partikular na ang source code development kinahanglang hingpit ang pagpanag-iya niini sa siyudad tungod kay ang mga programmer nagtrabaho ug gibayaran sa kagamhanan sa siyudad.

Ang siyudad kinahanglang adunay kompleto nga pagpanag-iya ug walay pugong nga pag-access sa tanang mga sangkap sa sestema ug mga source code.

Ug gumikan sa maong insidente pasumitehon ni Pepito ang IT department og kasamtangang palisiya sa IT infrastructure, source code access ug database integrity.  Ipaubos usab ni Pepito sa imbesgasyon sa City Legal Office tungod sa pagsabotahi sa IT personnel.

Magpahigayon usab og executive session karong Huwebes aron maaksiyonan ug mahatagan og siguridad ang digital nga imprastraktura sa kagamhanan.  BDB BANAT NEWS