Kampanya batok rabies abagan sa Kapitolyo

CEBU, Philippines — Abagan sa Kapitolyo ang kampanya batok sa rabies nonot sa daghan na nga kaso nga namatay sa rabies.

Si Dr. Elisse Nicole Catalan, ang Health Consultant, sa Probinsya sa Sugbo nibutyag nga motabang sila sa awareness campaign batok sa rabies diin ilakip kini sa ilahang health caravan services sa kalungsuran.

Samtang si Talisay City Mayor Gerald Anthony "Samsam" Gullas, nitug-an nga usa sa ilang dakong proyekto sa siyudad karong tuiga ang pagpabarug sa animal bite center

Una niini ang kabanay sa 33 anyos nga e-bike driver sa barangay Dumlog Talisay City ang nanawagan sa mga napaakan og mananap sama sa iro ug iring nga dili mokompyansa og magpabakuna gayud kay bililhon ang kinabuhi.

Ang mga ginikanan ni Johnrey Mansueto, 33anyos nagmahay nga wa dayon mapatambali ang ilang anak nga namatay tungod sa rabies. Matud pa sa mga ginikanan nga wala mopahibawo og sayo kanila ang ilang anak nga kini napaakan og iro ug uwahi na kini nga nadala sa tambalanan.

Gitug-an ni Juanito Mansueto, napaakan ug iro ang iyang anak mga buwan sa Mayo apan niadtong Hulyo 10, 2025 nagpakitabang na kini human giingong mahadlok na sa hangin og tubig ug nitug-an nga napaakan diay kini sa iro duha ka higayon.

Dugang pa sa amahan, nga iyang gitambagan iyang anak nga magpatambal apan nagdumili kini.

Ang amahan ug asawa niini nitug-an nga kung nipahibalo pa unta kini ug sayo mapangitaan kini nila og pamaagi nga matambalan og mahatagan ug anti-rabies injection.

Ang inahan nihulagway nga buotan ang iyang anak ug gani motabang kini kaniya apan kusog lang gayud kini moinom ug ilimnon nga makahubog. Sa dihang nasayran nga positibo sa rabies ang biktima didto gipabakunahan og anti-rabies ang mga community first responder sa barangay nga maoy nidala sa biktima ngadto sa tambalanan.Gihatagan usab ug bakuna ang sakop sa pamilya sa namatay.Matud ni Brandy Hervas, usa sa duha ka CFR nga nitabang sa biktima nga ilang nasuta nga ika-unom si Johnrey sa mga napaakan sa giingong iro nga buang ug napatay kini sa mga tambay sa dapit. Ang lima nga napaakan puros kini nagpabakuna. (BANAT NEWS)