Public library dress code

CEBU, Philippines — Sugod karong Agosto 18, 2025, ang Cebu City Public Library magpatuman og hustong dress code nga maoy sundon sa tanang mobisita sa library.       

Ang mamahimong makapahimulos sa library mao ang magsul-ob og casual apan desente nga sinina, t-shirt nga adunay sleeves, karsones, sayal nga adunay makiangayon nga gitas-on, sirado ug limpiyo nga sapatos.

Dili tugotan nga makasulog ang magsul-ob og sleeveless o backless nga sinina, shorts o mubo nga sayal, see-through o ‘revealing’ nga mga sinina ug ang magsul-ob og tsinelas.

Tumong sa pagpatuman sa maong palisiya sa library aron mahuptan ang usa ka luwas, matinahuron ug maabiabihon nga luna nga tun-anan alang sa tanan.

“We kindly ask you to wear appropriate and decent attire when visiting. Let’s all help maintain a comfortable and respectful environment for every reader, learner, and visitor”, tipik sa pahibalo sa Cebu City Public Library diha sa ilang Facebook page.

Gawas sa dress code, ang library nagtanyag og libre nga pag-scan ug pagpa-digitalize sa mga dokumento alang sa personal, research ug akademiko nga katuyoan subay sa Fair Use Compliant ubos sa Akta Republika 8293 kun “An Act Prescribing the Intellectual Property Code and Establishing the Intellectual Property Office, Providing for its Powers and Functions, and for other purposes”.

Matag indibidwal mamahimo nga hangtud sa 30 ka pahina lang ang mamahimong ma-scan.

Ug aron nga makapahimulos sa maong libre nga serbisyo mamahimong mobisita sa library ug mo-fill out og scanning request form. (BANAT NEWS)