Siyudad sa Mandaue moapil sa P20/kilo nga bugas

CEBU, Philippines — Ang Kagamhanan sa Dakbayan sa Mandaue, nga gipangulohan ni Mayor Thadeo Jovito “Jonkie” Ouano, nipadayag sa ilang tinguha nga moapil sa national nga programa sa gobiyerno nga P20 matag kilo nga bugas

Si City Administrator Atty. Gonzalo “Sally” Malig-on miingon nga suportado sa siyudad ang maong programa ug andam sila moapil niini. Apan iyang gi klaro nga wala pa’y pormal nga koordinasyon tali sa siyudad ug sa mga ahensya sa national government.

Dugang ni Malig-on nga nahibalo sila bahin sa programa apan wala pa’y klaro nga lakang o giya kung kanus-a ug unsaon ang pag-apil sa siyudad.

Iyang gidugang nga mangayo ang siyudad ug mga rekomendasyon ug tun-an ang mechanics sa programa, apil na ang proseso sa pagpatuman ug ang mga kwalipikasyon sa mga makabenepisyo.

Si Malig-on miingon nga nagtuo si Mayor Ouano nga makatabang kaayo kini nga programa sa daghang residente sa siyudad, labi na tungod sa mas ubos nga presyo sa bugas.

“In essence niingon man ang mayor nga kun makatabang, siyempre mas barato diba mas makatabang sa mga tao,” matud ni Malig-on.

Iyang giingon nga dili tanan maka-avail sa programa apan daghan ang makabenepisyo mao nga siguruhon sa siyudad nga tarong ang mechanics aron mahibw-an kung kinsa ang angay makadawat.

Sa iyang State of the Nation Address (SONA) niadtong Hulyo 28, gipadayag pag-usab ni Presidente Ferdinand Marcos Jr. ang commitment sa gobyerno sa P20 matag kilo nga programa sa bugas, ug gisiguro nga mahimo kini nga dili makadaut sa kita sa mga mag-uuma.  MEL BANAT NEWS