“4Ds” discipline campaign gilusad sa brgy Labangon

CEBU, Philippines — Pormal nga gilusad sa Barangay Labangon ang ilahang "4D's" discipline campaign niadtong Biyernes sa gabii, Agosto 1, 2025 sa Barangay Hall sa Labangon.

Ang kalihukan gitambungan ni Cebu City Councilor Paul Labra II ug Police Lieutenant Colonel Maria Theresa Macatangay, Deputy City Director for Operation sa Cebu City Police Office (CCPO) ug DILG.

Tumong sa maong programa nga matubag ang community concerns sama sa mga menor de edad nga naa gihapon sa kadalanan bisan curfew na, pag-inom sa kadalanan, problema sa basura ug sobra nga kasaba.

Ang "4D's" Campaign gilangkuban sa Disiplina sa Minors, Disiplina sa Side Street Drinking, Disiplina sa Basura ug Disiplina sa Karaoke o Loud Noise.

Si Labangon Barangay Captain Derrick Yap ang nangulo sa maong kalihukan pinaagi sa pakig-alayon sa Cebu City Government ug Cebu City Police Office.

Gihimug-atan ni Yap ang importansiya sa peace and order nga maghatag og kaayo sa Barangay Labangon.

"We need also to do our share sa Barangay Level kay dili man pwede isalig nato tanan sa siyudad, ang siyudad 80 ka Barangay giatiman", sigon ni Kapitan Yap. Gipasalig sab sa hepe sa Labangon Police Station 10 Police Major Erwin Abrasado nga mahapsay ug malinawon ang Barangay Labangon.

Samtang gihangop sab ni CCPO Deputy City Director for Operations Police Lieutenant Colonel Maria Theresa Macatangay ang maong programa sa barangay ug nanghinaot nga kini sundon sa ubang barangay sa Cebu City.

Si Cebu City Councilor Paul Labra II kinsa mao sab ang Chairman sa Committee on Peace and Order miingon nga ingon ani nga butang ang kinahanglan maatiman kun gusto og kalambuan sa barangay. MEL BANAT NEWS