Private CR sa duha ka terminal libre nga magamit

CEBU, Philippines — Sulod sa duha ka bulan libre ang paggamit sa mga comfort rooms (CRs) o mga pansayan nga gidumala sa pribadong kompaniya sa Cebu South Bus Terminal (CSBT) ug sa Cebu North Bus Terminal (CNBT) ug nagsugod kini niadtong Agosto 1.

Gibutyag ni Gobernador Pamela Baricuatro nga mao kini ang nasabotan nila uban sa Mr. Loo Philippines ang private firm nga nag-operate sa mga modernong CRs nga anaa sa mga provincal-run terminal.

"We have come up with an arrangement with Mister Lo nga while we are fixing the public toilets in both the north and the south bus terminals, they will give the toilets to us, free of charge, for two months" matud ni Baricuatro atol sa press conference niadtong Hulyo 30.

Sumala sa gobernador nga ang long-term nga solusyon sa Kapitolyo alang sa mga CRs sa mga terminal mao ang pag establisar og limpyo ug libre nga paggamit niini.

Sa pagkakaron padayon ang pag review sa Kapitolyo sa kontrata sa Mister Loo ug sa Probinsya nga unang napirmahan sa niaging administrasyon.

Unang gisaway ni Baricuatro ang maong kasabutan ug gihulagway nga dili makiangayon alang sa Probinsya tungod kay 5% ra ang gahin niini sa gross sales sa Mister Loo.  Matud ni Baricuatro nga usa sa ilang proposal sa Mister Loo aron makapadayon ang operasyon niini sa mga terminal sa Probinsya, mao ang pagpaubos na lang sa lease arrangement ug dili na ang paghatag og porsyento sa halin niini ngadto sa Probinsya. (BANAT NEWS)