Alert status sa bulkang Kanlaon ipaubos sa alert level 2

CEBU, Philippines — Gihangop sa Office of the Civil Defense (OCD)- 7ang anunsiyo sa Department of Science and Technology- Philippine Institute of Volcanology and Seismology (DOST-PHIVOLCS) nga ipaubos ngadto sa alert level 2 ang alert status sa bulkang Kanlaon.

Niadtong Hulyo 29, 2025 sa alas 6:30 sa gabii gipaubos ngadto sa alert level 2 o moderate unrest gikan sa alert level 3 o magmatic unrest ang status sa bulkan base sa Kanlaon Volcano Bulletin.

Matud sa DOST-PHIVOLCS nga ang kausaban sa status nagpakita sa kinatibuk-ang pagkunhod sa kalihokan sa bulkan human sa kataposang pagbuto niini niadtong Mayo 13, 2025.

Samtang ang OCD-7 nagkanayon nga gipakita sa monitoring data sa DOST-PHIVOLCS nga dili na sama sa una ang kadaghan sa volcanic earthquakes tungod kay nikunhod kini gikan sa 14 events kada adlaw ngadto sa walo na lang; nahunong usab ang pagbuga sa abo sa summit crater sukad sa kataposang panghitabo niadtong Hunyo 5, 2025; nikunhod na usab ang lebel sa sulfur dioxide ngadto sa average 1,857 tons matag adlaw alang sa period sa Mayo 13, 2025 hangtud karon gikan sa kaniadtong ihap nga 4,400  sa Hunyo 3, 2025 ug Pebrero 6, 2025 ug ni-deflate ang edipisyo sa Kanlaon gumikan sa paghinay sa kalihokan sa magma o pagkunhod sa volcanic gas.

Apan bisan pa sa maong kalamboan gihatagan og gibug-aton sa OCD-7 nga wala kini nagpasabot nga mobalik na sa normal nga kondisyon tungod kay possible gihapon nga dunay mahitabong kalit nga stream-driven o phreatic nga pagbuto nga makamugna og pyroclastic density currents (PDCs), ballistic projectiles, pagtagak sa mga bato ug makalisang nga gas sa bulkan.  Isip suporta sa advisory sa DOST-PHIVOLCS, ang OCD-7 kusganong niawhag sa mga residente sulod sa 4-kilometer Permannet Danger Zone (PDZ) nga magpabiling bakwit, alerto, motuman sa opisyal nga mga advisory ug adunay igong kahibalo pinaagi sa lehitimong tinubdan sa mga impormasyon.

Nipasidaan usab ang ahensiya nga kon ang monitoring data magpakita og pagbag-o sa kalihokan ang alert status mahimong isaka pag-usab ngadto sa level 3 apan kon magpadayon gani ang downtrend mahimo kining ipaubos ngadto sa alert level 1. BDB BANAT NEWS