Duha patay sa rabies

CEBU, Philippines — Duha ang namatay gumikan sa rabies sa Dakbayan sa Talisay sa buwan sa Hulyo niining tuiga sumala pa sa mga tinugyanan sa panglawas sa maong siyudad.

Ang unang kaso, mao ang 10 anyos nga babayeng taga Barangay Lawaan 3 nga namatay niadtong unang semana sa buwan sa Hulyo.

Matud pa ni Dr. Ma. Christine Hope Dejadena, city veterinarian sa Talisay nga wa pa nila matino gikan sa mga kabanay sa bata kun giunsa pagkahitabo nga kini nagka-rabies.

Gisusi pa nila kun unsay nakapaak sa bata nga nagdala og rabies, apan ilang nahibaw-an nga ang pamilya adunay binuhing usa ka gamay nga iring, apan wala pa sab masuta kun mao ba kini ang nakapaak o naka-kamras niya nga nagdala sa maong sakit.

Samtang ang ikaduha nga kaso,  natala niadtong Hulyo 11 ning tuiga diin usa ka E-bike drayber nga nagpangidaron og 33-anyos nga taga Barangay Dumlog ang nakabsan sa kinabuhi.

Uwahi na matud pa nahibaw-an sa mga kabanay nga napaakan kini og iro tulo ka buwan na ang nakalabay.

Matud pa napaakan kini og iro samtang nagpaabot og pasahero, apan wa gyud kini nagpabakuna ug wala sab kini nagsaba sa iyang pamilya.

Diha nalan nila nahibaw-an nga siya nagka- rabies niadtong Hulyo 10 diin naglain na ang iyang lawas.

Matud pa nagpakita kini og mga sintomas sa mga natakboyan og rabies sama sa,  mahadlok na sa hangin ug tubig ug nag-alindasay kini hangtud nga nakabsan gyud kini sa kinabuhi.

Si Dejadena nagkanayon nga subsob sila sa ilang kampanya pagpamakuna sa iring ug iro sa siyudad matag semana kuyog sa Aksyon Agad sa mga barangay matag semana.

Pirme nila nga gihangyo ang namuhi og iring ug iro nga pabakunahan gyud ang ilang binuhi ug higtan gyud kini aron di makapaak.

Si Bise Mayor Richard Francis “Choy” Aznar, chairman sa committee on health sa Konseho nibutyag nga kung mapaakan man og mananap sama sa iring o iro,  dili kini luomon ug angay gyud kini dayun ipahibawo sa Rural Health Unit (RHU) o sa barangay aron hatagan kini og dinaliang tambal.

Si Aznar nagkanayon nga dili angay kumpyansaan ang rabies busa sa mga nagbuhi og iro ug iring kinahanglan silang responsable nga pet owners. (BANAT NEWS)