Suspek sa pagpamusil nangadakpan

CEBU, Philippines — Duha ka suspetsado sa pagpamusil sa Barangay Poblacion Oriental sa Lungsod sa Consolacion nga naglakip sa 14 anyos nga minor de edad ang nadakpan sa gipahigayon nga hot pursuit sa kapolisan sa miaging Sabado sa hapon Hulyo 26, 2025

Ang mga nadakpan matud pa ni Police Lieutenant Colonel Eunil Evergonzado, hepe sa Consolacion Police Station nga mao silang alyas Yan-yan ug alyas Pipot nga nag-abang og panimalay sa Purok 1, Barangay Tugbongan sa maong lungsod apan lumad nga taga Lungsod sa Carmen

Matud pa ni Avergonzado nga nadakpan sab nila ang 14-anyos nga backup sa duha.

Si Avergonzado miingon nga ang mga dinakpan maoy suspetsado sa pagpusil patay sa usa ka 28-anyos nga lalaking taga Sitio Riverside, Poblacion Oriental sa Lungsod sa Consolacion.

Sa imbestigasyon nasuta nga ang biktima ug mga suspetsado ang nalambigit sa kalihokan sa illegal nga drugas human matud pa miangkon ang mga suspek nga naningil sila sa halin sa drugas sa biktima apan nasuko kini ug gisuwayan sila sa pagpusil maong ilaha kining napatay.

Nakuha nga mga ebidensiya gikan sa maong mga dinakpan ang usa ka kalibre .45 nga armas nga puno sa bala ug motorsiklo nga gituohang maoy ilang gisakyan paghimo sa krimen. — /IBM (BANAT NEWS)