Nagdaladala’g armas nangadakpan

CEBU, Philippines — Duha ka mga lalake ang gidakop sa managlahi nga dapit sa siyudad sa Sugbo tungod sa pagdala-dala og armas nga wala'y lisensya niadtong Huwebes sa gabii ug Biyernes sa kaadlawon, Hulyo 24 ug 25, 2025.

Unang nadakpan sa Guadalupe Police Station 9 Cebu City Police Office ang usa ka 56 anyos nga lalake diha sa Sitio Sandayong, Barangay Guadalupe ning siyudad.

Ang suspek  nga 56 anyos molupyo sa maong dapit.  Usa ka tawag gikan sa concerned citizen ang nadawat sa kapulisan labot sa armadong tawo sa dapit ug ilaha dayon kining girespondehan.

Nakuha gikan ang suspek ang usa ka paltik.22 caliber revolver nga dunay tulo ka bala.

Samtang pasado ala 1 sa kadlawon usa ka 19-anyos nga lalake ang nadakpan sa kapulisan sa Abellana Police Station 2 Cebu City Police Office sa Sitio Lower Kawayan, Barangay Sambag 2, Cebu City.

Ang suspetsado molupyo sa maong dapit gisumbong nga nagbadhas-badhas nga gabitbit og armas.  Nakuha gikan niya ang usa ka .38 caliber revolver nga dunay duha ka bala.  Ang mga suspetsado parehong wala'y napakitang mga dokumento nga magpamatuod lisensiyado ang ilang mga armas.

Kasong kalapasan sa Republic Act 10591 ang ipasaka batok sa mga suspetsado.

Sulod sa lima ka semana ang Police Regional Office(PRO)-7 nakasakmit na og 268 ka unlicensed firearms ug pagdakop sa 142 ka indibidwal sa tibuok Central Visayas, sugod Hunyo 13 hangtod sa Hulyo 17, 2025.

Ang 268 ka operasyon gilangkuban sa 183 ka police response operations, 46 ka search warrant services, 38 ka buy-bust operations ug usa ka warrant of arrest service samtang  14 sab ka explosives ang na-recover sa samang mga operasyon. IBM BANAT NEWS