Kaugmaran sa modernization sa CNU gisugdan na

CEBU, Philippines — Gipakita na sa Cebu Normal University (CNU) ang conceptual design sa Information and Communication Technology (ICT) development ug student smart hub sa Smart Hub Campus niini diin gisugdan na ang construction niadtong Hulyo 22, 2025.

Atol sa press conference gahapon, gipaambit ni Dr. Daniel Ariaso, Sr., SUC President III sa CNU ang mga hulagway ug plano sa umaabot nga P998 million Information and Communication Technology (ICT) modernization development program ug P947million centralized student smart hub.

Ipaubos sa modernization ang ASAB building nga dunay 14 ka lawak, ACAS building, second floor sa College of Teacher Education nga himuong library, Broadcasting station, College of Nursing ug Science building nga butangan og mga modernong teknolohiya nga magpakita sa tinguha niini nga makaangkon og world class facilities.

Ang gitanyag nga mga high-end nga modernong teknolohiya naglangkub sa computers, laptops, TV monitors, tablets, cameras, CCTVs, interactive board, ug uban pa.

Gilaoman nga mahuman sa Oktubre 15, 2025 ang modernization ug renovation ug gilaoman nga makadani kini og dugang mga estudyante. 

Ug tungod kay gisugdan na ang pag-renovate gipatuman ang temporaryong full online class set-up sa tunghaan sukad sa pag-abli sa klase aron masiguro ang kaluwasan ug kahimsog sa mga estudyante.

Apan ang desisyon nakadawat og lahi-lahing reaksiyon gikan sa mga tigtungha sa CNU diin kadaghanan dili uyon niini tungod kay giingong wala kini konsultasyon sa mga tinun-an hinungdan nga nagpahigayon og protesta ang mga Normalista diha atubangan sa unibersidad.

Matud ni Ariaso nga gawas sa ilang kaluwasan gihimo ang desisyon tungod kay last minute na usab nga gipahibaw sa mga contractor nga sugdan na ang kaugmaran ug ang bisan-unsang delay mahimong makalaslas sa budget alang niini.  Giangkon ni Ariaso nga nakasabot siya sa sentimento sa mga tinun-an ug nangayo kini og pasaylo ug nagkanayon nga ang maong kaugmaran alang kini sa ilang kaayohan paglikay sa mga disgrasya.

Dugang ni Ariaso nga sulod sa duha ka semana ilang gitun-an ang traffic flow ug pag-abli sa pipila ka mga pasilidad sama sa Idea and Knowledge Center, library, ug uban pa aron ma-access sa limitadong gidaghanon sa mga estudyante. BDB BANAT NEWS