DA nanghatag og kanding sa mga mag-uuma

CEBU, Philippines —  Mokabat sa 70 ka kanding nga nagkantidad og kapin P800 mil ang gi apod apod sa Department of Agriculture- SAAD Central Visayas ngadto sa duha ka asosasyon sa mga mag-uuma sa Sugbo.

Kini aron mapausbaw ang produksiyon sa kanding, ang kita sa mga mag-uuma, ug suportahan ang mga lokal nga negosyo sa kahayupan.

Ang Dawis Farmers Association (DAFA) sa Brgy. San Sebastian, Samboan, Cebu, ug ang Lawaan Farmers Association sa Brgy. Lawaan, Alcantara, Cebu nakadawat og pito ka production package sa kanding matag usa. Ang matag package adunay lima ka kanding—upat ka baye nga kanding o doelings ug usa ka laki nga kanding o buckling.

Kini nagtimaan sa ikaduhang batch sa pag-apod-apod sa kanding ubos sa proyekto sa SAAD nga "Goat Production with Marketing and Enterprise," nga gipunting ang dugang nga pito ka miyembro matag asosasyon. Sa kinatibuk-an, adunay 70 ka kanding nga nagkantidad og P832,230 ang naapod-apod sa duha ka asosasyon sa mga mag-uuma, diin matag usa nakadawat og 35 ka kanding nga nagkantidad og P416,115.

Ang interbensyon gihimo uban sa pakigtambayayong sa municipal government sa Samboan ug Alcantara, pinaagi sa ilang tagsa-tagsa ka buhatan sa agrikultura, nga nagpadali sa proseso sa paghatod ug pag-apod-apod.

Ang proyekto nagtumong sa pagtabang sa mga mag-uumang benepisyaryo nga makatukod og malungtarong mga negosyo sa pagpadako sa kanding nga dili lamang makadugang sa produksiyon kondili makamugna usab og dugang kita.

Isip kabahin sa pagpangandam, ang mga miyembro mipaubos sa pagbansay-bansay sa pag-atiman sa kanding aron maseguro nga nasangkapan sila sa kahibalo ug kahanas nga gikinahanglan aron mapadayon ang usa ka mauswagon nga negosyo.

Ubos usab sa mga termino niining proyekto sa SAAD, ang matag recipient kinahanglan nga mopasa sa lima ka nalutas nga mga kanding, usa ka lalaki ug upat ka babaye, ngadto sa laing miyembro sa asosasyon sa higayon nga ang mga hayop moabut sa unom ka bulan.

Dugang pa, ang tanang ginansya nga makuha gikan sa pagbaligya sa kanding i-deposito sa savings account sa asosasyon, diin ang mga kita bahinon base sa gikasabutan nga porsyento.

Aron masiguro ang long-term nga kalampusan sa proyekto, ang DA-SAAD Program mipasalig sa padayon nga paghatag og veterinary support ug regular nga pagmonitor sa panglawas sa mga hayop ug mga operasyon sa umahan.