Mga basurang plastic gihapon ang hinungdan sa pagbara

CEBU, Philippines — Nagkalainlaing matang sa basura, lapok ug mga sagbot ang nakaingon sa pagkabara sa pagdagayday sa tubig sa mga kanal sa Siyudad sa Lapu-Lapu nga maoy hinungdan sa pag -awas sa tubig nga miresulta sa pagbaha diha sa kadalanan ug sa mga kabalayan.

Kini ang namatikdan ni Kongresista Junard "Ahong" Chan sa gihimo niyang pag-inspection niadtong nakalabay nga adlaw  sa mga kanal nga nahimtang sa Barangay Pajo,  Pusok ug uban pa.

Si Chan miingon nga tataw kaayo nga usa sa mga hinungdan sa pagkabara sa tubig ang mga basura. Si Chan naagian sa Banat News nga nagsige og bara sa tabon sa mga kanal diha sa Barangay Pajo.

Kaning basura ug lapok ang nakaingon sa kalit nga mga pagbaha sa New Sangi Road sa Barangay Pajo.

Gipangablihan sa City Engineering Office ang mga manhole ug gipanguha ang mga basura ug gipanghabwa ang nagtipun-og nga mga lapok. Kasagaran sa mga basura mga plastic ilabi na ang botelya sa tubig.

Kaabag sa pagpanglimpyo ang mga kawani sa Clean and Green Office,  City Disaster Risk Reduction and Management Office uban usab kanila ang  barangay officials.

Dili kini maoy unang higayon nga gipang-ablihan ang mga kanal ug gihabwa ang mga basura kay kada bulan kini gibuhat apan mao gihapon, barado, kay puno napud og basura. IBM BANAT NEWS