Trak nga puno og manok nabitik sa kable

CEBU, Philippines — Nalimbuwad ang usa ka tak nga adunay kargang mga manok didto sa eskina Libo sa Barangay Pooc, Dakbayan sa Talisay niadtong Miyerkules sa gabii.

Si Jonathan Tumulak, pangu sa City of Talisay-Traffic Operation Development Authority (CT-TODA) nibutyag nga paingon maghatud sa manok ang truck.

Apan sa pag-abot nila sa maong lugar nabitik kini sa telco wire hinungdan nga nalimbuwad kini. Ang mga manok nga karga pulos nalisang sa pagkatumba.

Nimugna gyud kini og kalangan sa trapiko kay usa ra man ka lane ang pwede nga ma agian.

Pero sa dihang gitabangan kini og pabarog nibalik ra sab sa normal ang dagan sa trapiko. Ang drayber sa truck nakaangkon lang og ginagmay nga bun-og sa iyang lawas.

Padayun pa ang imbestigasyon sa CT-TODA bahin sa maong hitabo. Kaning mga nagkumbitay o nagyungyong nga mga kable sa mga telecommunications companies , ang kadaghanan wala nay gamit, padayong nakahatag og peligro sa mga motorista.

Sa pipila ka mga lugar sa Metro Cebu, ang mga telcos gimandoan sa mga LGUs pinasubay sa mga ordinansa aron hipuson ilang mga spaghetti wires. Apan tungod sa kadaghan niini, wala pay dapit nga matawag nga cleared na gikan sa spaghetti wires. (BANAT NEWS)