165 ka binilanggo sa TCJ nigdrawar sa ALS
CEBU, Philippines — Niabot sa 165 ka binilanggo sa Talisay City Jail ang nigradwar sa Alternative Learning System (ALS) sa Department of Education (DepEd).
Ang mga nigradwar nipaso nga nakatoga ug nidawat sa ilang diploma sa niaging semana.
Nasayran nga sa Talisay City Jail Male Dormitory, 30 ang nigradwar sa elementarya samtang 103 alang sa junior high school.
Samtang siyam sa elementarya ug 23 ang sa high school sa Talisay City Jail Female Dormitory.
Si alyas “Klang”, usa sa mga nigradwar nagkanayon nga ang edukasyon dili lang alang sa mga gawasnon alang usab kini sa mga tawo nga anaa sa sulod sa prisohan nga nagmalaomon nga mogawas sa umaabot nga mga adlaw ug magbag-o sa kinabuhi.
Ang kalihokan gitambongan ni Jail Chief Superintendent Luisito Muñoz, regional director sa BJMP-7 uban sa kadagkoan sa DepEd.
Ang programa magpadayon alang sa paghatag og kahigayonan nga anaa sa bilanggoan sa pagbag-o sa ilang kinabuhi ilabi na sa ilang pagbalik unya sa komunidad. (BANAT NEWS)
- Latest
