Global City Mandaue project hayan mapadayon na

CEBU, Philippines — Gipamatud-an sa Korte Suprema ang kabalido sa joint venture agreement (JVA) tali sa GlobalCity Mandaue Corporation (GMC) ug Mandaue City Government alang sa pagpatuman sa labing dakong reclamation project sa Sugbo.

Ang kasabutan gipirmahan niadtong 2014 sa kagamhanan sa dakbayan ug Sultan 900 Inc., ang contractual joint venture agreement (CJVA), uban sa GlobalCity Mandaue Corporation alang sa GlobalCity Mandaue Project, usa ka reclamation ug urban development initiative.

Ang 131 ka ektarya nga reclamation project tukoron libot sa Mactan Channel ug duol sa Marcelo Fernan Bridge, nga makapalapad sa yuta nga teritoryo sa Barangay Paknaan ug Umapad sa Mandaue City.

Ang gi-reclaim nga lugar gamiton isip mixed-use development zone para sa commercial, residential, industrial, ug tourism projects.

Kahinumduman ang pagpangandam alang sa pagpatuman sa proyekto nagsugod niadtong 2016, diin naglakip sa pag-hire og manpower ug pagpalit og generator sets, apan nalangan ang proyekto human napakyas ang Mandaue City Government sa pagkuha ug pagkompleto sa gikinahanglang permit.

Tungod niini miresulta kini ngadto sa legal nga proseso aron madeterminar kung kinsa ang angay manubag sa pagkalangan sa proyekto, nga nakaabot na sa Korte Suprema.

Ang Korte Suprema, bisan pa, nagpamatuod sa desisyon sa Pasig Trial Court ug Court of Appeals, nga nagmando sa duha ka partido sa pagtuman sa ilang obligasyon ubos sa CJVA.

Ang Korte Suprema namahayag nga ang GMC ug ang kagamhanan sa dakbayan kinahanglang motuman sa ilang mga obligasyon sa kontrata.

Hinuon, ang GMC mipasalig nga tumanon ang mga obligasyon niini.

Matud ni Hans Santos, legal counsel sa GMC, ang kompaniya motuman sa desisyon sa Korte Suprema ug andam nga makig-alayon sa kagamhanan sa dakbayan ug ubang ahensya sa pagpadayon sa GlobalCity Mandaue Project.

Sumala pa ni Santos, ang maong desisyon maghatag ug dalan sa mas dagkong mga oportunidad sa ekonomiya, dugang trabaho ug sa nagpadayon nga pagpalambo sa siyudad.

Dugang pa ni santos naghinam-hinam na sila sa pagdala sa usa ka world class nga proyekto maghatag og kaayohan sa lokal nga komunidad ug sa tibuok nasud. (BANAT NEWS)