Paspasan ang payroll

CEBU, Philippines — Ang paspas nga pagproseso sa payroll sa mga empleyado  sa Mandaue City Hall ang gitinguha karon ni  Mayor Thadeo Jovito “Jonkie”  Ouano.

Kini ang gibutyag ni Atty. Gonzalo “Sally” Malig-on, city administrator ngadto sa mga sakop sa konseho sa iyang pag-atubang niini sa regular session niadtong Lunes, Hulyo 14, 2025.

Matud ni Malig-on nga gitinguha ni Ouano ang paspas nga proseso sa payroll sa mga empleyado aron dili malangan ang pagpagawas sa mga suweldo niini.

Si Malig-on nagkanayon nga usa sa mga hinungdan nga malangan ang pagproseso sa payroll sa mga empleyado kon adunay usa niini nga nakuwangan ang gisumiter nga dokumento isip requirements.

Matud usab ni Malig-on nga gipangitaan na kini nila karon og mga pamaagi nga dili malangan ang processing sa payroll sa mga empleyado. Gikataho nga naandan nga gihimo mao ang pagbalik sa tibuok payroll ngadto  sa tig-andam niini ug ibalik usab kini kon makompleto na ang gikinahanglan nga mga rikisitos sa pag-process  sa payroll nga moresulta sa pagkalangan sa pagdawat sa sweldo sa tanang  empleyado.

Dugang ni  Malig-on nga naglakip  sa ilang gihimo mao ang pagtangtang sa pangalan sa hingtungdan nga empleyado nga nakuwangan ang gisumiter ug ipadayon ang pagroseso  sa payroll alang sa pagpadali sa pag-relase  sa ilang sweldo. (BANAT NEWS)