One Valid ID bill subling giduso ni Garcia

CEBU, Philippines — Giduso karon ni Kongresista Karen Hope Garcia ang balaodnon nga nag-require lang og usa ka valid identification card (ID) sa mga pampubliko o pribadong transaksiyon.

Ang One Valid ID bill nga unang giduso kaniadto ni kanhi kongresista Pablo John Garcia III ang gi-refile karon sa iyang asawa nga si Kongresista Karen ngadto sa kongreso.  Ang maong bill unang napasar kaniadto sa 2nd reading apan naabtan kini sa break sa House of Representatives hinungdan nga wala kini mapadayon ug karon subli kining giduso Kongresista Karen. 

Sa iyang explanatory note, si Garcia nagkanayon nga adunay ubang mga opisina nga dili motugot nga usa ra ka ID ang ipakita sa pipila ka transaksiyon nga nakahatag og kahasol sa publiko bisan og ang maong mga ahensiya nakasiguro sa seguridad ug reliabilitiy sa ID nga gipakita.

“This unduly burdens the public when such agencies can definitely ensure the integrity, security, and reliability of their government-issued identification cards or documents”, matud ni Kongresista Karen.

“This has also brought ordinary Filipinos much difficulty for various reasons—not all have applied for or can acquire a PhilSys ID and not everyone has another valid ID or multiple IDs for instance”, pasabot sa kongresista.

Ang maong balaodnon nagtinguha nga madali ug dili na hasol pa sa mga tawo nga adunay transaksiyon sa tanang branches, subdivisions, instrumentalities, LGUs, ug mga ahensiya sa gobiyerno lakip na sa mga GOCCs ug sa tanang pribado ug non-government entities.

Ubos sa maong balaodnon, ang mga giila nga ID nga magsilbi nga “valid proof of identity” nga magamit sa transaksiyon mao ang Philippine Identification System (PhilSys Digital ID o ePhilID; PhilippinePassport; driver’s license; Tax Identification Number (TIN) ID; Philippine Postal Corporation ID; Voter’s ID; Government Service Insurance System (GSIS) Unified Multi-Purpose Identification (UMID) Card; Social Security System (SSS) Card; PhilHealth ID; Professional Regulation Commission (PRC) ID; Integrated Bar of the Philippines (IBP) ID; Philippine Veterans Affairs Office (PVAO) ID; Senior Citizen Card; Person-With-Disability (PWD) ID; Solo Parent ID; Pantawid Pamilyang Pilipino Program (4Ps) ID; Overseas Workers Welfare Administration (OWWA) ID; Seafarers’ Identity Document (SID) and Seafarers’ Record Book (SRB); ug Alien Certificate of Registration (ACR) o Immigrant Certificate of Registration (ICR)

Tipik sa maong balaodnon nagkanayon nga dili na kinahanglan pa nga mohatag og sobra sa usa ka ID ang usa ka indibidwal sa bisa’g unsa nga transaksiyon.

Kon kini mahimo na nga balaod, ang bisa’g kinsa nga mobalibad sa pagdawat og usa ra ka ID nga walay igong rason mamahimong makamulta nga mokabat ngadto sa P500,000.

Kadtong mogamit usab og mga ID or dokumento sa ilegal ang mamahimong mapriso og dili sulod sa unom ka bulan hangtud duha ka tuig ug makabayad usab kini og multa nga P50,000 ngadto sa P500,000. (BANAT NEWS)