Sindikato sa mga kawatan

CEBU, Philippines — Nadakpan sa kapulisan sa Cebu City Police Office ang siyam ka mga giingong miyembro sa sindikato sa mga kawatan nga gitawag og Lavistre Group niadtong Miyerkules, Hulyo 9, 2025.

Nangadakpan sila human unang nadakpan sa security guard sa usa ka dakong mall sa South Road Properties, Barangay Mambaling ang suspek nga si Angelica Capales, 35 anyos, taga Quezon City.

Gikuha matud pa suspek ang mga mahalon nga mga sinina nga wala moagi og cashier ug nabantayan kini sa gwardiya hinungdan nga gidakop ug na-recover ang mga branded nga mga sapot.

Gipalawman sa kapulisan ang ilahang imbestigasyon ug didto nahibaw-an nga wala nag-inusara ang suspek.

Nitug-an si Capales sa otoridad nga naa pa siya'y laing mga kauban nga taga kaulohan usab ug naa karon sa Sugbo naghimo sa ilahang modus.

Nihimo dayon og follow-up operation ang Cebu City Police Office sa pagpangulo ni Police Major Kenneth Albotra sa City Investigation and Detection Unit.

Nadakpan nila ang walo ka mga kauban nga sila si Marilyn Traspaderme Lavistre, 37 anyos; Liza Lavistre, 38 anyos; Nekia Lavistre Francisco, 20 anyos; Mark Talinio Castillo, 40 anyos; Geralyn Ortea Perje, 39 anyos, pulos sila taga Quezon City.

Nasikop sab sila si Jason Pia Lozada, 44 anyos, taga Zone 1, Sogod Southern Leyte; Maricel Cruz Corre, 38 anyos, residente sa Ruby Ville, Baesa, Coloocan City; Charneth Corpuz, 18 anyos, molopyo sa Sampaloc, Manila.

Na-recover sa kapulisan gikan sa mga dinakpan ang mga branded nga mga sinina nga nibalor tanan og P100,000.

Gitug-an ni Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office taud-taod na nilang gi-monitor ang maong grupo human sila makadawat og impormasyon nga sila nangabot sa Cebu City.

Gihulagway ni Macatangay nga matawag gyud og sindikato ang maong grupo tungod kay daghan sila nga nag-operate ug dunay sistema ang ilahang paghimo sa krimen.

Matod pa ang maong mga suspetsado dunay local contact nga maoy maniid kun asa sila sunod mohimo og krimen.  Ang mga malls nga ilahang pang-ig-on kay kadtong mga dagko.

Gani nakaigo na sab ang maong mga suspetsado sa ubang mga lugar nga dunay nga dagkong malls.

Gisuwayan sa pagkuha ang ilang habig apan nagdumili na kini pag luwat og pamahayag.

Sa pikas bahin, gisubay sa CCPO ang viral video sa usa ka 6-anyos nga batang babaye nga giilogan og cellphone sa usa ka kawatan nga lalake diha sa Tupas Street, Barangay Pasil, siyudad sa Sugbo niadtong Lunes sa gabii, Hulyo 7, 2025.

Makita sa footage nga ang batang babaye naglingkod sa bangko ug nagduwa sa cellphone sulod sa usa ka barber shop nga parte sa balay nga gipuy-an sa pamilya sa bata.

Makita sab sa video ang usa ka lalake nga naa atbang sa karsada nagpaniid sa nahimutangan sa bata.

Nilabang kini, nipaduol sa bata ug nagsige pa og paniid sa palibot ug gikuha ang cellphone sa bata.  Sa kakugang sa bata igo nalang kini sa paghilak kini tungod usab kay nahadlok.

Ang pamilya sa bata miingon nga mingaw niadtong higayona, uban sa bata ang igsuon niini nga naglingkod apan nagtalikod ug wala makabantay sa kawatan.

Nakabantay sila sa insidente dihang nihilak na ang bata.  Gitan-aw nila ang CCTV footage ug didto nakita ang nahitabo, gipa-print ang nawong sa suspetsado ug gipaskil sa pamasin nga dunay nakaila.

Subay sa hitabo, ang CCPO niingon nga wala na blotter ang insidente ug sa social media nalang sila nasayod ug dali dayon nila kining gisusi. Nagpahimangno sab ang kapulisan nga dili ipasaya-saya og gamit ang cellphone sa mga bata nga wala pay buot. (BANAT NEWS)