Nanglabni duol sa police station

CEBU, Philippines — Walay swerte ang usa ka 39-anyos nga lalaking nisuway og pagpanglabni og cellphone diha sa J. Luna Extension sa Barangay Mabolo, Cebu City kagahapon sa kadlawon, Hulyo 8, tungod kay nadakpan kini dayun.

Daw mapanghagiton ang suspek nga RJ Bolaño Ganzo, nga taga Sitio Tarcom, Barangay Lahug, siyudad sa Sugbo tungod kay diha niya gibuhat ang krimen duol gyud sa Mabolo Police Station.

Ang biktima nga 21 anyos nga waitress nga taga Barangay Pajo, Lapu-Lapu City kuyog sa iyahang higala nga nagpaabot sa gi-book nga habal-habal.

Gikatahong kalit nga niabot ang suspe ug gilabni ang iyang cellphone nga Samsung A16 nga nagkantidad og P10,000 dayun nikaratil og dagan, apan ang kauban sa biktima nisyagit og maayo ug nangayo og tabang.

Hinungdan naalarma ang mga polis ug mga tawo nga daling nigukod niya hangtud nga naapsan ug nabawi ang cellphone.

Ang suspetsado miingon nga nanglabni siya kay iyahang ibaligya ang cellphone aron ipalit og pagkaon sa siyam niya ka mga igsuon kay kuwang kaayo iyang sweldo sa pag-extra extra niya sa construction.

Nasayran nga ang napriso na kaniadto tungod sa kalambigitan sa illegal nga drugas.  BANAT NEWS