Polis naunay sa armas, patay

CEBU, Philippines — Nabugtoan gyud sa kinabuhi ang usa ka polis nga nagranggo og Corporal human aksidente niyang nakablitan ang iyahang armas ug naigo kini sa tiyan diha sa Sitio Ukban, Barangay Buhisan, dakbayan sa Sugbo pasado alas-9 kagahapon sa buntag, Hulyo 8, 2025.

Ang namatay mao si Police Corporal Edmund Danieles Agustin, 33, nadestino sa Provincial Investigation and Detective Management Unit (PIDMU) sa Cebu Police Provincial Office(CPPO).

Nagkanayon si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nga dunay nakuhang CCTV footage ang mga imbestigador nga nakatabang sa imbestigasyon.

Didto nakita nga sa pag-uli sa biktima gikan sa duty nipahuway kini ug gihubo ang pistol belt niini ug gikuha iyahang calibre .9mm nga service firearm.

Apan aksidente niya kining nakablitan tumong sa iyang tiyan.

Gidala dayon kini sa mga kabanay sa Vicente Sotto Memorial Medical Center ug gitabang pa kini apan nakabsan gyud sa kinabuhi ang maong polis.

Sa kuha sa CCTV footage,  nag-inusara lang siya didto  sanglit ang anak niini naa pa sa tunghaan ug ang iyahang kapikas sa kinabuhi duna say gilakaw.

Wala'y nakitang foul play ang kapulisan sa nahitabo.

Tungod niini, subling giawhag ni Macatangay ang mga kaubanan nga mag-amping kanunay sa ilahang mga armas. IBM BANAT NEWS