13,000 apektado sa bagyong Danas
CEBU, Philippines — Kapin sa 13,000 ka tawo ang naapektahan sa kombinasyong epekto sa bagyong Danas ug hanging habagat sumala pa sa National Disaster Risk Reduction and Management Council (NDRRMC).
Sa pinakauwahing report, ang NDRRMC nagkanayon nga 3,773 ka pamilya o 13,006 ka tawo sa 14 ka mga barangay sa tibuok nasud ang naapektahan aning dautang panahon.
Matud pa sa ahensiya, 18 ka tawo gikan sa upat ka pamilya ang naa karon sa evacuation centers, samtang 3,000 sab ang gihatagan og tabang apan wala sila nipasilong sa evacuation sites.
Wala pay natala nga na-missing o nakalas atol ning pagsuwat sa balita apan dunay 13 ka mga balay ang nangaguba tungod aning pagsige og uwan ug kusog nga hangin.
Samtang 27 ka mga lugar sa Region 3 ang gilunopan sa baha ug nawad-an og kuryente nga naglakip og lima ka siyudad sumala pa sa NDRRMC.
Tungod sab ani, 219 lugar ang nipasuspeno sa klase ug 36 nipasuspenso sa trabaho.
Base sa alas 2 sa hapon, Hulyo 6, report gikan sa PAGASA, ang bagyong Danas nagpabilin gihapon sa gawas sa Philippine area of responsibility (PAR).
Gibanabana kining naa sa 355 kilometers west-northwest sa Itbayat, Batanes, nga nagdala og hangin nga 130 kilometers per hour (kph) ug haguros nga 160 kph, samtang nag-irog northeastward sa gipaspason nga 15 kph. — /IBM (BANAT NEWS)
- Latest
