Motorsiklo naatrasan sa bus
CEBU, Philippines — Nalandig sa tambalanan ang usa ka motorista human kini naatrasan og bus diha sa Upper Pakigne, Lungsod sa Minglanilla niadtong Sabado sa hapon.
Ang biktima mao si alyas “Rich”, hingkod ang panuigon samtang ang drayber sa bus mao si alyas “Luciano”, hingkod ang paunigon,
Base sa imbestigasyon sa Minglanilla Police Station nasuta nga ang bus paingon sa habagatan apan sa pag-abot sa nahisgutang lugar nabangga kini sa gasoline station.
Human sa pagbangga, niatras ang bus ug didto naigo sa motorsiklo hinungdan sa pagkaangol sa drayber.
Gikataho nga nawagtangan og preno ang bus hinungdan nga nahitabo ang disgrasya.
Gihulagway sa usa sa mga pasahero sa bus nga kusog ang ilang dagan. Ug gani nakabantay na sila nga nawagtangan og preno ang ilang gisakyang bus pag- abot na nila sa Barangay Pakigne.
Gikustodiya sa kapolisan ang drayber sa bus samtang nagpaabot nga pasakaan og kaso. — /BDB (BANAT NEWS)
- Latest
